काठमाडौं । पाकिस्तान आईसीसी विश्वकप टी–२० क्रिकेटको सेमिफाइनलमा पुगेको छ । मंगलबार राति अबुधाबीमा भएको खेलमा नामिबियामाथि ४५ रनको जित निकाल्दै पाकिस्तान लगातार चौथो जितसहित सेमिफाइनलमा पुगेको हो ।
समूह २ मा रहेको पाकिस्तान एक खेलअघि नै सेमिफाइमा पुगेसँगै अर्को एक टिमको दाबेदारी पनि सीमित हुँदै गएको छ । पाकिस्तानको ४ खेलबाट ८ अंक छ भने दोस्रो स्थानको अफगानिस्तानको ३ खेलमा ४ अंक रहेको छ । तेस्रो स्थानको न्यूजिल्याण्डको २ खेलबाट २ अंक छ ।
चौथो नामिबियाको ३ खेलबाट २ अंक छ । पाँचौं भारतको २ खेलबाट अंक छैन । भारतको सेमिफाइनलको आशा भने अझै रोकिएको छैन ।
भारतले बाँकी तीन वटै खेलमा जित हासिल गर्दै अफगानिस्तानले न्यूजिल्याण्डलाई हराएमा भारत सेमिफाइनलमा पुग्नेछ ।
पुछारको स्कटल्याण्डको २ खेलबाट अंक छ । उसको पनि सेमिफाइनल प्रवेश गर्ने ढोका बन्द भएको छैन ।
नामिबियाको इनिङ्स
१९० रनको विजयी लक्ष्य पाएको नामिबियाले २० ओभरमा ५ विकेटको नोक्सानीमा १४४ रनमात्र बनाउन सक्यो । नामिबियाका लागि डेभिड वाइसीले ३१ बलमा नटआउट रहँदै ४३ रन बनाए ।
क्रेग विलियम्सले ३७ बलमा ४० रन बनाए । स्टेफेन बार्डले २९ बलमा २९ रन बनाए । त्यस्तै कप्तान जेहार्ड इरास्मसले १० बलमा १५ रन बनाए ।
पाकिस्तानका हसन अली, इमाद वासिम, हरिस राउफ र शदाब खानले १–१ विकेट लिए । शहीन शाह अफ्रिदी भने विकेटविहीन भए ।
पाकिस्तानको इनिङ्स
खेलमा पहिले ब्याटिङ्ग गरेको पाकिस्तानले २ विकेटको नोक्सानीमा १८९ रन बनायो । पहिलो विकेटका लागि ११३ रनको साझेदारी भएको इनिङ्समा मोहम्मद रिजवानले ५० बलमा ७९ रन बनाए ।
कप्तान बाबर आजमले ४९ बलमा ७० रन बनाए । मोहम्मद अफिजले १६ बलमा ३२ रन जोडे । फखर जमान भने ५ बलमा ५ रन बनाएर आउट भए ।
डेभिड वाइसी र जान फ्राइलिंकले १–१ विकेट लिए ।
समूह १ को अंक तालिका
दक्षिण अफ्रिका समूह १ को दोस्रो स्थानमा रहेको छ । दक्षिण अफ्रिकाको ४ खेलबाट ६ अंक रहेको छ ।
तेस्रो स्थानको अष्ट्रेलियाको ३ खेलबाट ४ अंक रहेको छ । योसँगै समूह १ बाट सेमिफाइनलमा पुग्ने दावेदारी छोटिँदै गएको छ । ४ खेलबाट ८ अंकको इङ्गल्याण्ड शीर्ष स्थानमा रहँदै सेमिफाइनलमा पुगिसकेको छ ।
समूहका अन्य तीन टिमहरु २ अंकका श्रीलंका र वेष्टइन्डिजसँगै अंकविहीन बंगलादेश बाहिरिइसकेका छन् । बंगलादेशले ४ खेलबाट अहिलेसम्म अंक बटुल्न सकेको छैन ।
