काठमाडौँ। मधेस केन्द्रित दलको बन्दसँगै चर्किएको अघोषित नाकाबन्दीले मुलुकको अर्थतन्त्र तहसनहस भई दैनिक जनजीवन गम्भीररुपमा प्रभावित भएकाले चाँडो समस्याको समाधान गर्न नेपाल चेम्बर अफ कमर्सले माग गरेको छ । सोमबार यहाँ पत्रकार सम्मेलन आयोजना गरी विषम परिस्थितिमा सरकारले समस्याको समाधानको पहलमा लाग्नुपर्ने र आन्दोलनरत दलहरु जिम्मेवार भएर अगाडि बढ्न चेम्बर अफ कमर्सले जोड दिएको हो ।
“अहिले विषम परिस्थितिको यथाशीघ्र समाधान होस् भन्ने जोड्दार माग गर्दछौँ” चेम्बरका अध्यक्ष राजेशकाजी श्रेष्ठले भने । उनले नाकाबन्दीले बैंक तथा वित्तीय संस्थासमेत जोखिमयुक्त हुने र सामाजिक एवम् आर्थिक विकृति मौलाउने भएकाले त्यसतर्फ सबै सचेत हुनुपर्ने बताए । सरकारले जारी गरेको श्वेतपत्रले देशको वर्तमान अवस्थालाई सम्बोधन गर्न नसकेको उल्लेख गर्दै उनले भने, “श्वेतपत्रमा वर्तमान अवस्थाको विश्लेषण मात्र गरिएको छ, यो अवस्था सिर्जना गर्ने वास्तविक कारणहरु र समस्या समाधानबारे स्पष्ट गर्न सकेको छैन ।”
बन्द र नाकाबन्दीले देशको अर्थतन्त्र झन्डै एक दशकपछि परेको र चालु आवको आर्थिक वृद्धिदर नकारात्मक हुने स्पष्ट भइसकेको अवस्थामा चाँडो समस्याको समाधानतर्फ लाग्नुपर्नेमा अध्यक्ष श्रेष्ठले जोड दिए ।
