arrow

‘फास्ट ट्र्याक’ नेपालले बनाउने भन्ने निर्णय ओली जीले मेरै जोडबलमा गर्नु भएको हो : प्रचण्ड

‘फास्ट ट्रयाक’ विदेशी कम्पनीलाई दिने मेरो कुनै सोच छैन, भारत जानुअघि विज्ञहरु बोलाएर राय लिन्छु

logo
प्रकाशित २०७३ भदौ १३ सोमबार
pm-bjye-bhet.jpeg
काठमाडौं । प्रधानमन्त्री पुष्पकमल दाहालले आफू भारत भ्रमणमा जानुअघि विज्ञहरु बोलाएर राष्ट्रिय महत्वका विषयहरुमा नीतिगत र प्राविधिक राय लिने बताएका छन् । 
 
सोमबार राष्ट्रिय सरोकार अभियान नेपालको टोलीसँगको भेटमा प्रधानमन्त्रीले यसो भनेका हुन् । प्रधानमन्त्रीले भने, ‘तपाईहरुले निकै गम्भीर विषयहरु उठाउनुभएको छ ।
 
राष्ट्रिय महत्वका विषयहरुमा राष्ट्र हित विपरित निर्णय नहुन् भन्नेमा तपाईहरुले उठाएको विषय महत्वपूर्ण छ । यहाँहरुले भनेजस्तै भ्रमण अघि नै उच्चस्तरीय सम्मेलनको आयोजना गर्न त समय पुग्दैन । तर, भ्रमणमा जानुअघि विज्ञहरु बोलाएर नीतिगत र प्राविधिक राय लिनेछु ।’
 
प्रधानमन्त्रीले निजगढ काठमाडौं द्रुत मार्ग (फास्ट ट्रयाक) विदेशी कम्पनिलाई दिने आफ्नो कुनै सोच नभएको बताएका छन् । प्रधानमन्त्री दाहालले भने, ‘फास्ट ट्रयाक नेपालले नै बनाउनुपर्छ भन्ने अघिल्लो सरकारको निर्णय मेरै पहलमा भएको हो । त्यतिबेला म उच्चस्तरीय राजनीतिक समितिको संयोजक थिएँ । मेरै जोडबलमा ओलीजीको सरकारले त्यो निर्णय गरेको हो । फास्ट ट्रयाक विदेशी कम्पनिलाई दिने भन्नेबारे चलाइएका हल्ला पूर्णतः निराधार हुन् । यो कुरामा सबै प्रष्ट हुन जरुरी छ ।’
 
प्रधानमन्त्रीले आफू धेरै बोल्ने भन्दा धेरै गर्ने ठाउँमा भएको जोड दिँदै भने,  ‘अहिले धेरै भन्नु छैन, धेरै गर्नुछ । तपाईहरुले राष्ट्रिय चिन्तासहित राखेका विषयमा म गम्भीर छु । चुनौतीहरु थुप्रै छन् । मिलेर सामना गरेर मात्र यसलाई अवसरमा बदल्न सकिन्छ ।’ प्रधानमन्त्रीले संविधान कार्यान्वयन र राष्ट्रिय एकता सुदृढ गर्न सबैलाई मिलाएर लानुपर्ने बताउँदै भने, ‘संविधान कार्यान्वयन गर्ने दायित्व हाम्रो काँधमा आएको छ, राष्ट्रिय एकता सुदृढ गर्नुछ । यसका लागि सबै शक्ति शक्तिहरुसँग सहकार्य गर्न जरुरी छ । तर, मेरो नेतृत्वको सरकारले सहकार्य गर्दा कसैसँग राष्ट्रिय हित विपरित सम्झौता गर्दैन ।’
 
प्रधानमन्त्रीले राष्ट्रिय स्रोत साधन भएर पनि गरीब हुनुपर्ने र सम्पन्न हुने नाममा राष्ट्रियतामाथि खेलबाड गर्ने दुवै प्रवृत्ति रहेको भन्दै आफू दुवै अतिबाट बचेर सन्तुलित ढंगले अगाडि बढ्ने बताए । यस्तै, प्रधानमन्त्री दाहालले माथिल्लो कर्णालीको ‘पिटिए’को बेला माओवादी केन्द्र प्रतिपक्षमा रहेको जानकारी गराउँदै माथिल्लो कर्णालीको विषयमा माओवादी केन्द्रको असहमति रहेको सुनाए । 
 
भेटमा पूर्व गर्भनर डा. दिपेन्द्रबहादुर क्षेत्री, विज्ञहरु प्रा.डा.हरि पण्डित, डा. गोपाल सिवाकोटी ‘चिन्तन’, डा. द्धारिकालाल ढुंगेल, रत्नसागर श्रेष्ठ, लोकबहादुर रावत, भरतबहादुर शाही, डा.मंगल बिश्वकर्मा लगायतले निजगढ–काठमाडौं द्रुतमार्ग, माथिल्लो कर्णाली, अरुण तेस्रो, उपल्लो मस्र्याङ्दी जलविद्युत आयोजना लगायतका राष्ट्रिय आयोजनाहरु नेपाली लगानीमा नै निर्माण गर्न प्रधानमन्त्रीको ध्यानाकर्षण गराएका थिए । 



लोकप्रिय समाचार
लोकप्रिय समाचार
नयाँ