ओल्ड ट्राफोर्ड । इङलिश लिग कप फुटबलमा म्यानचेष्टर सिटीमाथि जित हासिल गर्दै म्यानचेष्टर युनाइटेडले बदला लिएको छ ।
पछिल्लो समय इङलिश प्रिमियर लिग फुटबलम राम्रो फर्ममा नदेखिएको म्यानचेष्टर युनाइटेडले लिग कपमा भने प्रिमियर लिगको शीर्ष स्थानमा रहेको म्यानचेष्टर सिटीमाथि १–० को जित निकालेको हो ।
यो जितले म्यानचेष्टर युनाइटेडका म्यानेजर जोजे मौरिन्होलाई भने ठूलो राहत मिलेको छ ।
मौरिन्होले म्यानचेष्टर सिटीका म्यानेजर पेप ग्वार्डिओलासंग बदलासमेत लिएका छन् ।
बुधबार राति भएको खेलमा म्यानचेष्टर युनाइटेडलाई जिताउन खेलको ५४ औं मिनेटमा हुँवा माटाले गरेको गोल नै निर्णायक बन्यो ।
त्यसपछि गोलका लागि प्रयास त भएका थिए तर कसैले सकेनन् ।
म्यानचेष्टर सिटी भने खासै लयमा देखिएको थिएन । ग्वार्डिओलाले टिममा नौ परिवर्तन गरे तर त्यसले केही काम गरेन ।
ग्वार्डिओलाले सर्जिओ अगुएरोलाई बेन्चमा थक्याएर राखेका थिए ।
मौरिन्होले भने ज्लाटान इब्राहिमोभिच र पल पोग्बालाईसमेत समेटेर मजबूती देखाएका थिए ।
जितसंगै म्यानचेष्टर युनाइटेड लिग कपको क्वार्टरफाइनलमा पुगेको छ ।
त्यस्तै वेष्टह्याम र साउथह्याम्पटन पनि क्वार्टरफाइनलमा पुगेका छन् ।
मौरिन्होले दोहोरो खुसी हासिल गर्ने क्रममा उनको प्रतिद्धन्द्धी क्लव चेल्सी वेष्टह्यामसंग २–१ ले पराजित भयो ।
वेष्टह्यामका कौयाटे र फर्नान्डेजले गोल गर्दा अन्तिम समयमा चेल्सीका गेरी काहिलले सान्त्वना गोलमात्र फर्काउन सके ।
त्यस्तै साउथह्याम्पटनले सन्डरल्याण्डलाई १–० ले हरायो । साउथह्याम्पटनका बौफालले निर्णायक गोल गरे ।
