काठमाडौँ। अख्तियार दुरुपयोग अनुसन्धान आयोगले काठमाडौँ महानगरपालिकाका वरिष्ठ इन्जिनियर रामहरि फुयाँलले दुई करोड ७३ लाख ९ हजार ३३२ भ्रष्टाचार गरेको दाबीसहित आज विशेष अदालतमा मुद्दा दायर गरेको छ ।
फुयाँलको सम्पत्ति छानबिन गर्दा स्रोत नखुलेको पाइएकाले मुद्दा दायर गर्नुपरेको जनाइएको छ । आयोगले फुयाँल सार्वजनिक सेवामा प्रवेश गरेदेखि २०७१ साल फागुनसम्मको सम्पत्ति छानबिन गरिएको बताएको छ ।
यस्तै महानगरपालिकाका इन्जिनियर गम्भीरलाल श्रेष्ठले रु एक करोड २९ लाख ७४७ भ्रष्टाचार गरेको अभियोगमा आजै मुद्दा दायर गरेको छ । आयोगले आज विज्ञप्ति प्रकाशन गरी सार्वजनिक सेवामा प्रवेश गरेपछि २०७१ माघसम्मको सम्पत्ति छानबिन गर्दा श्रेष्ठले आय गरेको वैध आम्दानीभन्दा अवैध आम्दानी बढी देखिएको पाइएको जनाएको छ । आयोगले सम्पत्तिको स्रोत पुष्टि गर्न नसकेपछि उनले आर्जन गरेको रकम अवैध पाएको थियो । रासस
