काठमाडौं । चिकित्सा क्षेत्रको सुधारको माग राखि आमरण अनशनरत डा. गोविन्द केसीको जीवन रक्षाको माग राख्दै विभिन्न चिकित्सक संगठनहरुले नेपाल चिकित्सक संघलाई पत्र लेखेका छन् ।
शुक्रबारबाट त्रिवि शिक्षण अस्पतालको वहिरंग सेवा बहिस्कार गरेको नेशनल रेजिडेन्ट्स डाक्टर्स एशोसिएशन, केसीको अभियानमा सक्रिय सोलिडारिटी फर डा. केसी अलायन्सलगायत ८ वटा संगठनले संयुक्त पत्र लेखेका हुन् ।
पत्रमा डा. केसी आमरण अनशन बसेको १३ दिन वितिसकेको छ र स्वास्थ्यमा कुनै पनि बेला गम्भीर देखिन सक्ने कुरा विधितै छ । यो अवस्थामा नेपालमा चिकित्सकहरुको छाता संगठन नेपाल चिकित्सक संघले तत्काल यो आन्दोलनको अपनत्व र नेतृत्व लिनुपर्ने हाम्रो ठहर छ –भनिएको छ ।
डा. केसीको जीवन रक्षा र केसीले उठाएका मुद्दा तथा नेतृत्व गरेको लडाइँ हामी समस्त चिकित्सकको मात्र नभई तमाम नेपालीको हितमा रहेकाले दुवैको रक्षका लागि कत्ति पनि ढिलो गर्न हुँदैन–विज्ञप्तिमा उल्लेख छ ।
विज्ञप्तिमा अगाडि भनिएको छ , ‘अनशनको झण्डै दुई साता भइसक्दा समेत राज्यले चरम संवेदनहिनता देखाइरहँदा परिस्थितिको गम्भीरतालाई बुझेर नेपालभरका चिकित्सकहरुको संलग्नतामा तत्काल कडाभन्दा कडा कार्यक्रम ल्याउन हामी चिकित्सक संघलाई जोडदार माग गर्दछौं ।’
