नेपाल र वेष्ट इन्डिजको दोस्रो खेल आज, पहिलो खेल जितेर नेपाल उत्साही [फोटोफिचर]
हाम्रा कुरा
प्रकाशित २०८१ वैशाख १६ आइतबार
205
Shares
काठमाडौँ । नेपाल र वेष्ट इन्डिज ए बीचको टी–२० क्रिकेट श्रृंखलाको दोस्रो खेल आज हुँदैछ । खेल दिउँसो १२ः१५ देखि त्रिभुवन विश्वविद्यालयको कीर्तिपुर मैदानमा हुनेछ ।
यसअघि पहिलो खेल जितेर नेपाल निकै नै उत्साही देखिएको छ । फराकिलो चुनौती सहजै पूरा गर्दै नेपालले सनसनीपूर्ण जित हासिल गरेको हो ।
शनिबार भएको खेलमा नेपाल ४ विकेटले विजयी भएको हो । २०५ रनको चुनौती नेपालले २ बल खेल्न बाँकी छँदै ६ विकेट गुमाएर पूरा गरेको हो ।
नेपालका लागि कप्तान रोहित पौडेलले ५४ बलमा ६ छक्का र १० चौकाको मद्धतले ११२ रन बनाए । त्यस्तै दिपेन्द्र सिंह ऐरीले १८ बलमा २४ रन बनाए ।
वेष्ट इन्डिजका म्याथ्यु फोर्ड र ओबेड म्याक्कोएले समान २–२ विकेट लिए ।
यसअघि नेपालले टस जितेर पहिले फिल्डिङ रोजेसँगै ब्याटिङ गरेको वेष्ट इन्डिजले आक्रामक खेल्दै ५ विकेटको क्षतिमा २०४ रन बनायो ।
कप्तान रोस्टन चेजले ४६ बलमा ७४ रन बनाए । त्यस्तै ओपनर एलिक एथानाजले २५ बलमा ४७ तथा केसी कार्लीले २६ बलमा ३८ रन बनाए ।
नेपालका लागि दिपेन्द्र सिंह ऐरी, कमल ऐरी, अविनाश बोहरा र रोहित पौडेलले १–१ विकेट लिए । कमजोर बलिङ गरेको नेपालले १७ रन अतिरिक्तका रुपमा दिएको थियो ।
आगामी जुन २ तारिखमा वेष्ट इन्डिज र अमेरिकाको संयुक्त आयोजनामा हुने विश्वकपको तयारीका लागि नेपाललाई यो निकै राम्रो अवसर रहेको छ । पहिलो खेलबाट कप्तान रोहितको लामो समयदेखि खड्किएको ब्याटिङ पनि खुलेको छ । नेपालको सबैभन्दा ठूलो ‘स्ट्रेन्थ’ बलिङ भए पनि बलिङको लय पकड्न सकेको छैन ।
पाँच खेलको टी–२० श्रृंखला खेल्न पहिलो पटक वेस्ट इन्डिजको ए टिम नेपाल आएको हो । शनिबारको खेलमा दर्शकले पनि भरपूर मजा लिएका थिए ।
तेस्रो खेल बुधबार, चौथो बिहीबार र पाँचौँ खेल आगामी शनिबार हुनेछ ।
