क्याम्प नोउ । बार्सिलोना स्पेनिश घरेलु फुटबल प्रतियोगिता कोपा देल रे को प्रिक्वार्टरफाइनलमा प्रवेश गरेको छ । घरेलु मैदान क्याम्प नोउमा बिहीबार बिहान भएको खेलमा कमजोर टिम हर्कुलसमाथि दोस्रो लेगमा ७–० को फराकिलो जित हासिल गर्दै बार्सिलोना अन्तिम १६ मा ठाउँ बनाउन सफल भएको हो ।
यो जितले बार्सिलोनाले समग्रमा ८–० को जितसंगै प्रिक्वार्टरफाइनलमा ठाउँ बनाएको हो । पहिलो लेगको खेलमा बार्सिलोना १–१ को बराबरीमा रोकिएको थियो ।
बार्सिलोनालाई जिताउन आर्द तुरानले ह्याट्रिक पूरा गरे । त्यस्तै पाको एल्कासेरले बार्सिलोनामा गोलको खडेरीको अन्त्य गरेका छन् । उनले बार्सिलोनाका लागि लामो समयपछि पहिलो गोल दिलाएका हुन् ।
बार्सिलोनाको फराकिलो जितका लागि लुकास डिग्ने, इभाँ राकिटिक र राफिन्हाले पनि एक एक गोल गरे ।
यो खेलमा मुख्य गोलकर्ताहरु लिओनल मेसी, लुइस सुवारेज र नेमार भने थिएनन् । उनीहरुलाई प्रशिक्षक लुइस इन्रिकले बिदा दिएका छन् ।
बार्सिलोनाको यो जितले भने शीर्ष खेलाडीहरुको अभाव खड्कन दिएन ।
अन्य खेलमा भ्यालेन्सियाले लेगनेसलाई २–१ ले, ओसासुनाले ग्रानाडालाई २–० ले, डेपोर्टिभोले रियल बेटिसलाई ३–१ ले, सेभिल्लाले फर्मेन्टेरालाई ९–० ले हरायो । सेभिल्लालाई जिताउने क्रममा लुसियानो डारियो भिट्टो र पाउलो गान्सोले ह्याट्रिक गरे ।
