उद्योगमन्त्रीले उद्योगीहरुलाई बोलाएर भने : लगानी भित्र्याउन सरकारले अब के के गर्नुपर्यो ?
उद्योगीहरुले लगानीमैत्री वातावरण अझै नबनेकाे मात्रै बताए
प्रकाशित २०७३ पुष ११ सोमबार
1.1k
Shares
काठमाडौं । उद्योग मन्त्री नवीन्द्रराज जोशीले निजी क्षेत्रलाई कसरी प्रोत्साहीत गर्न सकिन्छ भन्नेमा सरकार कृयाशिल रहेको बताएका छन् । नेपालमा लगानी गरिरहेका निजी क्षेत्रका उद्योगीहरुसँग सोमबार उद्योग मन्त्रालयमा आयोजित छलफलमा मन्त्री जोशीले लगानीकर्ताहरुको लगानीलाई सुरक्षित गर्न कानुनी रुपमा नै प्रत्याभूत गर्न सरकार कृयाशिल रहेको भन्दै लगानी सुरक्षित रहेको बताउने सरकारले के गर्नुपर्छ भनेर सोधेका थिए ।
यसका लागि सरकारले विशेष आर्थिक क्षेत्र सम्वन्धि ऐन र कार्यविधि समेत पारित गरिसकेको औद्योगिक व्यवसाय प्रवद्र्धन ऐन पारित भई विनियमावली बन्ने चरणमा रहेको, खानी नियमावलीमा समसामयिक सुधार गरिएको, कम्पनी ऐन संसदमा छलफलमा रहेको, वैदेशिक लगानी तथा प्रविधि हस्तान्तरण ऐन आगामी २ हप्ता भित्र मन्त्रिपरिषद्मा पेश गर्ने तयारी भईरहेको र वौद्धिक सम्पत्ति सम्वन्धी ऐन मस्यौदाको क्रममा रहेको भन्दै यस भन्दा थप मन्त्रालयले अरु के गर्नुपर्ने छ ? भनेर प्रश्न गरेका थिए ।
उद्योग दर्ता प्रकृयालाई सहज बनाउन उद्योग विभाग र कम्पनी रजिष्टारको कार्यालयबाट हुने काममा सहजिकरण गर्न सरकारकै तर्फबाट सहयोगीको व्यवस्था गर्न लागिएको भन्दै मन्त्री जोशीले उद्योगको आगमन र यहाँ गरिने कार्य र फिर्ती सबैलाई सरल बनाउन लागिएको बताए ।
भैरहवा, सिमरा र पाँचखालमा विषेश आर्थिक क्षेत्रको स्थापना, गजेन्द्रनारायण सिंह औद्योगिक क्षेत्रको संचालन तथा ७ वटै प्रदेशमा औद्योगिक क्षेत्रका स्थापना सरकारको प्राथमिकतामा रहेको मन्त्री जोशीले बताए ।
छलफल कार्यक्रममा उद्योग मन्त्रालयका सचिव शंकरप्रसाद कोईरालाले निजी क्षेत्रको समस्या समाधानका लागि उद्योग मन्त्रालयले इमान्दार प्रयास सुरु गरिसकेको र यसको परिणाम छिट्टै देखिने बताए । अरु मन्त्रालय सँग गाँसिएका समस्या समाधानका लागि पनि उद्योग मन्त्रालयबाट निरन्तर प्रयासको थालनि गरिएको भन्दै सचिव कोईरालाले औद्योगिक व्यवसाय प्रवद्र्धन सम्वन्धि नयाँ नियमावलीले कतिपय समस्याहरुलाई सम्वोधन गर्ने बताए ।
छलफलमा उद्योगिहरुले समग्र औद्योगिक वातावरणमा सुधार नभए सम्म थप लगानी आउन नसक्ने भन्दै उद्योग मन्त्रालयको मात्र प्रयासले औद्योगिक वातावरण वन्न नसक्ने बताए । उद्योग मन्त्रालयले अहिले ल्याएका ऐनहरुको प्रशंसा गर्दै उनीहरुले यसका साथसाथै श्रम ऐन, सामाजिक सुरक्षा सम्वन्धि ऐन र वातावरण मैत्री ऐन पनि उद्योग मैत्री हुन जरुरी रहेको उनीहरुको भनाई थियो ।
स्थानीय स्तरमा निर्वाचित सरकार नहुँदा उद्योग संचालनमा समस्या देखिएको भन्दै उनीहरुले उद्यमशीलतालाई प्रवद्र्धन गर्ने वातावरण वन्नु जरुरी रहेको बताए । नेपालको अर्थतन्त्रको मोडेल कस्तोहुने भन्नेमा अन्यौलता रहेको भन्दै निजी क्षेत्रका प्रतिनिधिहरुले उद्योगका लागि जग्गा प्राप्ति पनि प्रमुख समस्याको रुपमा रहेको बताए ।
घरेलु तथा साना उद्योग स्थापनाका लागि न्यूनतम् पूँजी तोकिनु समस्याका रुपमा रहेको भन्दै उनीहरुले उद्योगका लागि बिजुली प्राप्ति पनि ठुलो समस्याको रुपमा रहेको बताए । आयातित वस्तुहरुका एन. एस. मार्क नचाहिने तर नेपाली बस्तुको हकमा एन. एस. मार्क चाहिने व्यवस्थाले नेपाली वस्तुको प्रतिस्पर्धी क्षमतामा ह्रास आएको बताए ।
अन्य मूलुकमा उद्योग बर्ष दिनमा ३३० दिन चल्ने तर नेपालमा २५० दिन भन्दा बढि नचल्ने भन्दै उहाँहरुले सरकारी विदाको संख्या बढि रहेको बताए । एउटा नियमले प्रदान गरेको सुविधा अर्को नियमले काट्ने गरेको भन्दै निजी क्षेत्रका प्रतिनिधिहरुले नितीगत स्थायित्व हुनुपर्नेमा जोड दिए ।
