स्टामफोर्ड ब्रिज । इङलिश प्रिमियर लिग फुटबलमा चेल्सीको चार्म बढ्दै गएको छ । चेल्सीले पछिल्ला १२ खेल जितेर उपाधिका लागि सबैभन्दा बलियो दावेदारी पस्किएको छ । चेल्सीले सोमबार राति भएको खेलमा एएफसी बर्नमाउथलाई ३–० ले हरायो ।
घरेलु मैदानमा चेल्सीलाई लगातार १२ औं जितको कीर्तिमान बनाउने क्रममा पेड्रो रोड्रिग्वेजले दुई गोल गरे भने एडिन हजार्डले पेनाल्टीमाफृत एक गोल थपे । जितसँगै चेल्सीले अंक तालिकाको अग्रतालाई अझै फराकिलो पारेको छ ।
१८ खेलबाट चेल्सीको ४६ अंक भएको छ भने दोस्रो स्थानको म्यानचेष्टर सिटीको ३९ अंक भएको छ । म्यानचेष्टर सिटीले सोमबार रातिको खेलमा हल सिटीलाई ३–० ले हरायो ।
म्यानचेष्टर सिटीलाई जिताउन याया टौरे र केलेचीले एक एक गोल गरे । कुर्टिसले ९० औं मिनेटमा आत्मघाती गोल थपिदिएका थिए ।
त्यस्तै लिगको अर्को खेलमा म्यानचेष्टर युनाइटेडले सन्डरल्याण्डलाई ३–१ ले हरायो । डाले ब्लाइन्ड, ज्लाटान इब्राहिमोभिच र हेन्रिक खितर्यानले एक एक गोल गरे ।
त्यस्तै आर्सनलले वेष्ट ब्रोमविचलाई १–० ले हरायो । एभर्टनले लेष्टर सिटीलाई २–० ले पराजित गर्यो ।
तालिकामा लिभरपुल ३७ अंकसहित तेस्रो स्थानमा छ । लिभरपुलले मंगलबार राति स्टोक सिटीसँग खेल्नेछ । त्यस्तै आर्सनल पनि ३७ अंकसहित चौथो स्थानमा छ ।