कानपुर । भारतको उत्तरप्रदेशस्थित कानपुरमा बुधबार बिहान रेल दुर्घटना हुँदा कम्तीमा दुई जनाको मृत्यु भएको छ । दुर्घटनामा ४८ जना घाइते भएका छन् ।
बिहान स्थानीय समय अनुसार ५ः३० बजे सियालदह–अजमेर एक्सप्रेस रेल दुर्घटना भएको हो । रेलका दुई डिब्बा नहरमा खसेका थिए भने १५ डिब्बाले रेलको लिक छोडेका थिए ।
कानपुर प्रहरीका अनुसार कानपुरबाट ५० किलोमिटर टाढा रुला इलाकामा भएको घटनामा घाइतेहरुको उद्धार गर्न ढिलाइ भएको छ । रेल मन्त्री सुरेश प्रभुले दुर्घटना दुर्भाग्य भन्दै अनुसन्धानका लागि आदेश दिएका छन् ।
यसअघि कानपुरकै देहात स्टेशनमा गत नोभेम्बर २० तारिखमा इन्दोर–पटना एक्सप्रेसको रेल दुर्घटना हुँदा १४५ जनाको मृत्यु भएको थियो भने १७५ बढी घाइते भएका थिए ।
सो घटनामा मृत्यु भएका २५ जनाको अझै सनाखतसमेत हुन सकेको छैन ।
