काठमाडौ‌ । प्रधानमन्त्री पुष्पकमल दाहाल‘ शनिबार संयुक्त अरब इमिरेट युएईको अवुधावी जाँदै छन् । ‘वल्ड फ्युचर इनर्जी समिट, २०१७ को विशेष वक्ताका रुपमा सहभागी हुन १० सदस्यीय नेपाली प्रतिनिधिमण्डलको नेतृत्व गर्दै प्रधानमन्त्री दाहाल युएर्इको राजधानी अवुधावी जान लागेका हुन् ।

प्रधानमन्त्री दाहाललाई युएर्इका उपराष्ट्रपति एवम् प्रधानमन्त्री मोहम्मद विन रसिद मोक्तुमले विशेष निमन्त्रणा दिएको प्रधानमन्त्रीको निजी सचिवालयले जनाएको छ ।

प्रधानमन्त्रीको टोलीमा परराष्ट्र मन्त्रालयका सचिव शङ्करदास बैरागी, शिष्टाचार महापाल दीपक अधिकारी, स्वकीय सचिवालयका सदस्य छन् । यस्तै ऊर्जा मन्त्री जनार्दन शर्मा, ऊर्जा मन्त्रालयका सहसचिव लगायतको टोली पनि सोही प्रतिनिधिमण्डलको सदस्यका रुपमा समिटमा सहभागि हुनुहुने कार्यक्रम छ ।

प्रधानमन्त्रीले आउँदो सोमबार सो समिटमा ऊर्जाका विभिन्न क्षेत्र, नेपालमा लगानीको अवसर, नेपालले अवलम्बन गरिरहेको नीति एवं भावी परिदृश्यका बारेमा विशेष सम्बोधन गर्नुहुने कार्यक्रम रहेको प्रधानमन्त्रीको निजी सचिवालयले जानकारी दिएको छ ।

प्रधानमन्त्री दाहाल नेतृत्वको प्रतिनिधिमण्डलले युएइका राष्ट्रप्रमुख, सरकार प्रमुख एवम् उच्च अधिकारीसँग आपसीहित, द्विपक्षीय चासो, क्षेत्रीय एवम् अन्तर्राष्ट्रिय चासोका विषयमा महत्वपूर्ण भेटवार्ता गर्ने कार्यक्रम रहेको परराष्ट्र मन्त्रालयका सहसचिव एवं शिष्टाचार महापाल अधिकारीले जानकारी दिए ।

भेटवार्ताका क्रममा प्रधानमन्त्रीले नेपाली कामदारको समस्या समाधान गर्न, सुरक्षित एवं भरपर्दो रोजगारीको वातावरण बनाइदिन र कामदार सुरक्षाको विषयमा समेत समकक्षी एवं उच्च सरकारी अधिकारीसँग कुराकानी गर्नुहुने कार्यक्रम छ ।

शिष्टाचार महापाल अधिकारीले कूटनीतिक सम्बन्ध स्थापना भएको लामो समय भए पनि युएइमा यस स्तरको उच्चस्तरीय भ्रमण यसअघि नभएको बताए । प्रधानमन्त्रीले समकक्षी मोहम्मद विन रसिद मोक्तुमसँग आपसीहित र द्विपक्षीय चासोका विषयमा आगामी आइतबार द्विपक्षीय कुराकानी गर्ने छन् ।

सोमबार समिटको उद्घाटनसत्रमा प्रधानमन्त्रीले विशेष सम्बोधन गर्ने र सोही दिन सम्मेलनमा सहभागी हुन आएका विभिन्न मुलुकका राष्ट्राध्यक्ष एवं सरकार प्रमुखसँग आपसीहित र चासोका विषयमा छलफल गर्ने कार्यक्रम छ ।

वैकल्पिक ऊर्जाका क्षेत्रमा युएइले गरेको विकास संसारका लागि अनुकरणीय रहेको सन्दर्भमा त्यसबाट नेपालले फाइदा लिन सक्नेछ । सम्मेलनमा ऊर्जाका क्षेत्रमा काम गर्दै आएका ३२ मुलुकका ६०० बढी कम्पनीले भाग लिँदैछन् भने विभिन्न ३० कार्यक्रममा १२५ जना विषय विज्ञले आफ्नो प्रवचन दिने कार्यक्रम रहेको छ ।

वैकल्पिक ऊर्जाको विकास र विस्तारमा जोड दिने लक्ष्यका साथ समिटको आयोजना गरिएको हो । समिटमा ऊर्जाका क्षेत्रमा पछिल्लो दिनमा विकसित प्रविधि तथा उपकरणको समेत प्रदर्शनी गरिनेछ ।

सम्मेलनमा ऊर्जा मन्त्री शर्माले पनि महत्वपूर्ण सम्बोधन गर्ने कार्यक्रम रहेको ऊर्जा मन्त्रालयका सहसचिव चिरञ्जीवी चटौतले जानकारी दिए । उनका अनुसार समिटमा सहभागी मुलुकका ऊर्जा मन्त्री एवम् ऊर्जा क्षेत्रका जानकारसँग नेपालको लगानीको अवसर एवं अनुसन्धानको क्षेत्रका काम गर्न आग्रह गरिनेछ ।

वैकल्पिक ऊर्जाका क्षेत्रमा अन्तर्राष्ट्रिय क्षेत्रमा सक्रियतापूर्वक काम गर्दै आएको इन्टरनेशनल रिन्युएबल इनर्जी एजेन्सीको मुख्यालयसमेत युएइमा नै रहेको सन्दर्भमा समिटबाट नेपालले महत्वपूर्ण फाइदा लिनसक्ने सहसचिव चटौतको भनाइ छ । रासस