रत्ननगर (चितवन)। दक्षिण चितवनको माडीमा हात्तीले उधुम मच्चाएपछि वन्यजन्तुको आक्रमण नियन्त्रणको माग गर्दै स्थानीयले शनिबार यातायात बन्द गराएका छन् ।
इलाका प्रहरी कार्यालय माडीका अनुसार चितवन राष्ट्रिय निकुञ्जबाट जङ्गली जनावर बस्तीमा पसेर जनधनको क्षति पुर्याउँदै आएको भन्दै स्थानीयले वन्यजन्तु नियन्त्रणको माग गर्दै शनिबार यातायात बन्द गरेका हुन् । बन्दका कारण माडीका सवारी साधन रोकिएका छन् ।
शुक्रबार चितवन निकुञ्जबाट बस्तीमा पसेको हात्तीको आक्रमणबाट माडीका १३ वर्षीय सागर सुनारको मृत्यु भएको थियो । सोही घटनापछि स्थानियहरु आक्रोशित बन्दै यातायात बन्द गरेका हुन् ।
