लण्डन । इङलिश प्रिमियर लिग फुटबलमा म्यानचेष्टर सिटी र टोटनह्याम हटसपरले बराबरीको खेल खेलेका छन् । घरेलु इत्तेहाद मैदानमा खेलेको म्यानचेष्टर सिटीले २–२ को बराबरीमै चित्त बुझाएको हो । खेलमा २–० ले अग्रता लिएर पनि म्यानचेष्टर सिटी बराबरीमा समेटिन पुगेको हो । ४९ औं मिनेटमा लेरोइ सान र ५४ औं मिनेटमा केभिन डे बु्रनले गोल गर्दै सिटीलाई अगाडि ल्याए ।
तर ५८ औं मिनेटमा डेले अली र ७८ औं मिनेटमा ह्युङ मिन सनले गोल गर्दै टोटनह्यामलाई बराबरीमा ल्याए । त्यस्तै म्यानचेष्टर युनाइटेड पनि बराबरीमा समेटिएको छ । म्यानचेष्टर युनाइटेड स्टोक सिटीसंग उसकै मैदानमा १–१ को बराबरीमा समेटिएको हो । हुँवा माटाले आत्मघाती गोल गर्दा १९ औं मिनेटमा स्टोक सिटीले अग्रता लियो ।
तर अन्तिम समयमा वाइने रुनीले गोल गर्दै म्यानचेष्टर युनाइटेडलाई हारबाट जोगाए । यता लिभरपुललाई घरेलु मैदानमा झर्को झड्का लागेको छ । लिभरपुल स्वान्सी सिटीसंग ३–२ ले पराजित भएको छ ।
स्वान्सीले २–० ले अग्रता लिए पनि रोबर्टो फर्मिनोको दुवै गोलबाट बराबरीमा आयो । तर सिगुड्सनले गोल गर्दै स्वान्सीलाई जिताए । स्वान्सीका लागि फर्नान्डो लोरेन्टले दुई गोल गरेका थिए ।
लिग अन्तर्गत अन्य खेलमा बर्नमाउथ र वाटफोर्डले २–२ को बराबरी खेले । त्यस्तै वेष्टह्यामले मिडिल्सब्रोलाई ३–१ ले, एभर्टनले क्रिष्टल प्यालेसलाई १–० ले तथा वेष्टब्रोमले सन्डरल्याण्डलाई २–० ले हरायो ।
यो खेलपछि चेल्सीलाई भने निकै फाइदा पुगेको छ । शीर्ष स्थानको चेल्सीको २१ खेलबाट ५२ अंक छ । २२ खेलबाट टोटनह्यामको ४६, लिभरपुलको ४५, आर्सनलको ४४, म्यानचेष्टर सिटीको ४३ तथा म्यानचेष्टर युनाइटेडको ४१ अंक छ ।
