काठमाडौँ। विभिन्न उपकरणको प्रयोग गरी गैरकानुनी रूपमा मिटर बक्सको अङ्क घटाई विद्युत् चुहावट गर्ने कार्यमा संलग्न विद्युत् प्राधिकरणका पूर्व तथा बहालवाला कर्मचारी र व्यवसायी गरी १६ जनालाई आइतबार प्रहरीले पक्राउ गरेको छ ।
विगत लामो समयदेखि दर्जनौँ उद्योग, कलकारखाना, गार्मेण्ट, होटल, लज तथा व्यक्ति विशेषका घरमा जडित बिजुलीका मिटर बक्स मिलेमतो गरी मिटरको अङ्क घटाउने कार्यमा संलग्न १० जना बहालवाला कर्मचारी र दुई जना पूर्वकर्मचारी तथा चारजना व्यवसायीलाई महानगरीय अपराध महाशाखाको प्रहरी टोलीले काठमाडौँ उपत्यका र हेटौँडाका विभिन्न स्थानबाट पक्राउ गरेको हो ।
सो कार्य गरेबापत ती कर्मचारीले विभिन्न उद्योग कलकारखाना तथा घरधनीबाट दैनिक तथा मासिकरुपमा मोटो रकम लिँदै आएको यहाँ आज आयोजित पत्रकार सम्मेलनमा महानगरीय अपराध महाशाखाका प्रमुख, वरिष्ठ प्रहरी उपरीक्षक सर्वेन्द्र खनालले जानकारी दिए ।
पक्राउ पर्ने बहालवाला कर्मचारीमा नेपाल विद्युत् प्राधिकरण, बालाजु शाखाका सुपरभाइजर सुमन श्रेष्ठ, बानेश्वर शाखाका इलेक्ट्रिसियन अच्यूत खड्का, नेपाल विद्युत् प्राधिकरण वितरण तथा ग्राहक सेवा निर्देशनालय, रत्नपार्कका वरिष्ठ सहायक दिलबहादुर साउद, सोही निर्देशनालयका मिटर रिडर ओम ढुङ्गाना, श्याम बस्नेत, प्रदिप शर्मा, ठाकुर महर्जन, मनिज श्रेष्ठ, लगनखेल शाखाका मिटर रिडर सूर्यबहादुर थापा र हेटौँडा वितरण केन्द्रका मिटर रिडर महादेव प्रधान रहेका छन् ।
पक्राउ पर्ने पूर्वकर्मचारीमा नेपाल विद्युत् प्राधिकरण, भक्तपुरका पूर्व सुपरभाइजर भगवान् पाण्डे, प्राधिकरणका पूर्वमेन्टिनेन्स कर्मचारी टहलबहादुर कार्की रहेका छन् ।
यसैगरी, मञ्जुश्री खानेपानीका सञ्चालक गोकर्णेश्वर नगरपालिकाका कुमार लामा, हाउडा जिल्ला उदयनारायणपुर थाना, भारत घर भई गौशालामा मिठाइ पसल सञ्चालन गर्दै आएका तपन घोस, मोतिहारी जिल्ला, पूर्वी चम्पारण भारत घर भई नक्सालमा कपास फ्याक्ट्री सञ्चालन गर्दै आएका परवेज आलम र मोरङ, कोशीहरैचा घर भई रामेश्वर मिठाइ पसल सञ्चालक रमेश चूँडाललाई प्रहरीले पक्राउ गरेको हो ।
प्रमुख खनालले यस्तो कार्यमा ठूलै गिरोह संलग्न रहेको खुलेको बताउँदै अन्य व्यक्तिसमेत पक्राउ गर्ने तयारी भइरहेको जानकारी दिए । ती कर्मचारीले नेपाल विद्युत् प्राधिकरणका बिल रिडरले उद्योग कलकारखाना तथा व्यक्ति विशेषका घरमा गई मिटरमा उठेको रकमभन्दा कम अङ्कको बिल बनाई मिटर रिडर र ग्राहक मिल्ने गरेको अनुसन्धानबाट खुलेको प्रहरीले जनाएको छ ।
प्राधिकरणको बहालवाला र पूर्वटेक्निसियन तथा सुपरभाइजरले मिटर बक्सको सिल काटी मिटरमा उठेको अङ्कलाई बिल बराबरको अङ्क उल्टोबाट घुमाई मिलाउने गरेको, अङ्क मिलाएपश्चात् सिल वायर, सिल गोटीको प्रयोग गरी मिटरमा आफैँले सिल लगाउँदै आएका थिए ।
मिटरको सिल खोल्न र बन्द गर्न प्रयोग हुने उपकरण सिल वायर, सिल गोटी, हुक, कटिङ पिलास, नोजल पिलास, पेन्चिस, चक्कु, मार्तोल, टेप तथा टर्चलाइट टेक्निसियन स्वयम्ले साथमै गैरकानुनीरुपमा राख्ने गरेको प्रहरीले जनाएको छ ।
उनीहरुले प्रत्येक दिन २० देखि २५ स्थानमा उक्त कार्य गर्दै आएको, विगत १२ वर्षदेखि विद्युत् चुहावट गरी ठगी गर्ने कार्यमा संलग्न हुँदै आएको, मिटर रिडरले मिटर रिड गरेपछि मिटरमा उल्लेखित युनिटभन्दा कम युनिटको बिल बनाउने गरेको अनुसन्धानका क्रममा खुलेको छ ।
चार-पाँच महिनासम्म कम युनिटको बिल बनाएपछि ग्राहकले टेक्निसियन कर्मचारी बोलाएर मिटरको युनिट अङ्क घटाउन लगाउने गरेको, टेक्निसियनका कर्मचारीले मिटर बक्सलाई उनीहरुकै घरमा समेत लगेर मिलाइ पुनःजडान गर्ने गरेका थिए ।
मिलाएको युनिटको आधा रकम ग्राहकले र आधा रकम मिटर रिडर, टेक्निसियन कर्मचारी तथा पुरानो मिटर रिडरलेसमेत बाँडफाँड गरी लिने गरेको अनुसन्धानबाट खुलेको छ । उनीहरुले बढी विद्युत् खपत हुने उद्योग, कलकारखाना तथा व्यक्ति विशेषका घरमा यस्तो कार्य गर्दै आएको खुलेको छ ।
Meter Alter गर्ने मुख्य प्राविधिकहरू :
-
नाम : सुमन श्रेष्ठ
उमेर : ५० वर्ष
ठेगाना : का.जि.का.म.न.पा.वडा नं.२८
पेशा : नेपाल विद्युत प्राधिकरण, बालाजुको सुपर भाईजर
-
नाम : टहल बहादुर कार्की
उमेर : ५६ वर्ष
ठेगाना : जि.रामेछाप, ठोसे गा.वि.स.वडा नं.९
हाल : का.जि.का.म.न.पा.वडा नं.३४
पेशा : नेपाल विद्युत प्राधिकरणको पूर्व मेन्टिनेन्स
मिटर रिडरहरू :
-
नाम : महादेव प्रधान
उमेर : ५१ वर्ष
ठेगाना : जि.सर्लाही, हरिपुर-९
हाल : जि.मकवानपुर, हटौडा
पेशा : मिटर रिडर (नेपाल विद्युत प्राधिकरण, हेटौडा वितरण केन्द्र)
-
नाम : अच्युत खड्का
उमेर : ३९ वर्ष
ठेगाना : जि.सिन्धुपाल्चोक, सुनखानी गा.वि.स.वडा नं.२
हाल : का.जि.का.म.न.पा.वडा नं.३५ जडिवुटी
पेशा : ईलेक्ट्रिसियन (नेपाल विद्युत प्राधिकरण शाखा कार्यालय, बानेश्वर)
-
नाम : दिल बहादुर साउद
उमेर : ५१ वर्ष
ठेगाना : जि.अछाम, भट्टाकाटिया गा.वि.स.वडा नं.५
हाल : का.जि.का.म.न.पा.वडा नं.३५ कोटेश्वर
पेशा : बरिष्ठ सहायक (नेपाल विद्युत प्राधिकरण वितरण तथा ग्राहक सेवा निर्देशनालय, रत्नपार्क काठमाण्डौ )
-
नाम : ओम ढुंगाना
उमेर : ४८ वर्ष
ठेगाना : जि.नुवाकोट, चारघरे गा.वि.स.वडा नं.३
हाल : का.जि.नागार्जुन न.पा.वडा नं.२ रानीवन
पेशा : मिटर रिडर (नेपाल विद्युत प्राधिकरण वितरण तथा ग्राहक सेवा निर्देशनालय, रत्नपार्क काठमाण्डौ )
-
नाम : श्याम बस्नेत
उमेर : ५० वर्ष
ठेगाना : जि.रामेछाप, सालुपाटी गा.वि.स.वडा नं.३
हाल : का.जि.का.म.न.पा.वडा नं.३४ शंखमुल
पेशा : मिटर रिडर (नेपाल विद्युत प्राधिकरण वितरण तथा ग्राहक सेवा निर्देशनालय, रत्नपार्क काठमाण्डौ )
-
नाम : प्रदिप शर्मा
उमेर : ४६ वर्ष
ठेगाना : का.जि.नागार्जुन न.पा.वडा नं.१ रानीवन
पेशा : मिटर रिडर (नेपाल विद्युत प्राधिकरण वितरण तथा ग्राहक सेवा निर्देशनालय, रत्नपार्क काठमाण्डौ )
-
नाम : सूर्य बहादुर थापा
उमेर : ३९ वर्ष
ठेगाना : जि.दाङ्ग, फूलवारी गा.वि.स.वडा नं.५
हाल : जि.ललितपुर, ईमाडोल
पेशा : मिटर रिडर (नेपाल विद्युत प्राधिकरण, लगनखेल)
-
नाम : ठाकुर महर्जन
उमेर : ४४ वर्ष
ठेगाना : का.जि.का.म.न.पा.वडा नं.३४ बानेश्वर
पेशा : मिटर रिडर (नेपाल विद्युत प्राधिकरण वितरण तथा ग्राहक सेवा निर्देशनालय, रत्नपार्क काठमाण्डौ )
-
नाम : मनिज श्रेष्ठ
उमेर : ४९ वर्ष
ठेगाना : का.जि.का.म.न.पा.वडा नं.१०
पेशा : मिटर रिडर (नेपाल विद्युत प्राधिकरण वितरण तथा ग्राहक सेवा निर्देशनालय, रत्नपार्क काठमाण्डौ )
-
नाम : भगवान पाण्डे
उमेर : ५४ वर्ष
ठेगाना : जि.भक्तपुर, नगरकोट न.पा.वडा नं.६
पेशा : नेपाल विद्युत प्राधिकरण, भक्तपुरको पूर्व सुपर भाईजर
उद्योग कलकारखानाका संचालकहरू :
-
नाम : कुमार लामा
उमेर : ३२ वर्ष
ठेगाना : का.जि.गोकर्णेश्वर न.पा.वडा नं.१३
पेशा : पानी फ्याक्ट्री (मञ्जुश्री खानेपानी)
-
नाम : तपन घोस
उमेर : ५१ वर्ष
ठेगाना : हाउडा जिल्ला उदयनारायणपुर थाना, भारत
हाल : का.जि.गौशाला
पेशा : मिठाई पसल संचालक
-
नाम : परवेज आलम
उमेर : ४६ वर्ष
ठेगाना : मोतिहारी जिल्ला, पूर्वि चम्पारण भारत
हाल : का.जि.नक्साल
पेशा : कपास व्यापारी
-
नाम : रमेश चुँडाल
उमेर : ३८ वर्ष
ठेगाना : जि.मोरङ, कोशिहैरचा न.पा. वडा नं.१२
हाल : का.जि.अनामनगर
पेशा : रामेश्वर मिठाई पसल संचालक
अपराध कार्य विधी :
-
नेपाल विद्युत प्राधिकरणका विल रिडरहरुले उद्योग कलकारखाना तथा व्यक्ति विषेशका घरहरुमा गई मिटरमा उठेको रकम भन्दा कम अंकको विल बनाई मिटर रिडर र ग्राहक मिल्ने गरेको ।
-
प्राधिकरणको वहालवाला र पूर्व टेक्निसियन तथा सुपरभाईजरले मिटर बक्सको सिल काटी मिटरमा उठेको अंकलाई विल बराबरको अंक उल्टोबाट घुमाई मिलाउने ।
-
अंक मिलाए पश्चातः सिल वायर, सिल गोटीको प्रयोग गरी मिटरमा आफैले सिल लगाउदै आएको ।
-
मिटरको सिल खोल्न र बन्द गर्न प्रयोग हुने उपकरणहरु सिल वायर, सिल गोटी, हुक, कटिङ पिलास, नोजल पिलास, पेन्चिस, चक्कु, मार्तोल, टेप तथा टर्च लाईट टेक्निसियन स्वयमले साथमै गैर कानुनी रुपमा राख्ने गरेको ।
-
निजहरुले प्रत्येक दिन २० देखि २५ स्थानहरुमा उक्त कार्य गर्दै आएको भेटिएको ।