लण्डन । इङलिश क्लव म्यानचेष्टर युनाइटेड इएफएल कप फुटबलको फाइनलमा प्रवेश गरेको छ । सेमिफाइनलमा हल सिटीलाई समग्रमा ३–२ ले पराजित गर्दै म्यानचेष्टरले फाइनलमा ठाउँ सुरक्षित गरेको हो ।
पहिलो लेगमा २–० जित निकालेकै आधारमा म्यानचेष्टर फाइनलमा पुगेको हो । दोस्रो लेगको खेलमा हलसिटीको मैदानमा घरेलु टिम बिहीबार राति २–१ विजयी भए पनि समग्रमा भने पराजित हुँदै बाहिरिएको हो ।
म्यानचेष्टरका लागि पल पोग्बाले गोल गरे भने हल सिटीका लागि टम हडलस्टोन र बाये उमर नियास्सेले गोल गरे ।
अब उपाधिका लागि म्यानचेष्टर युनाइटेडले साउथह्याम्पटनसंग खेल्नेछ । साउथह्याम्पटनले सेमिफाइनलमा लिभरपुललाई हराएको थियो ।
फाइनल खेल वेम्बलेको मैदानमा एक महिनापछि फेबु्रअरी २६ तारिखमा हुनेछ ।
