उडपार्क । म्यानचेष्टर युनाइटेड र टोटनह्याम हट्सपर इङलिश घरेलु फुटबल प्रतियोगिता एफए कप फुटबल प्रतियोगिताको क्वार्टरफाइनलमा पुगेका छन् । पाँचौं चरणको खेलमा म्यानचेष्टरले ब्ल्याकबर्न रोभर्सलाई २–१ ले हराउँदै क्वार्टरफाइनलमा पुगेको हो ।
ब्ल्याकबर्नकै मैदान उडपार्कमा भएको खेलमा अग्रता भने ब्ल्याकबर्नले लियो । १७ मिनेटमै डानियल ग्राहामले गोल गर्दै म्यानचेष्टरलाई दबाबमा राखे । तर २७ औं मिनेटमा मार्कस रास्फोर्डले गोल गर्दै म्यानचेष्टर युनाइटेडलाई बराबरीमा ल्याए ।
निर्णायक गोल भने ७५ औं मिनेटमा ज्लातन इब्राहिमोभिचले गरे ।
युनाइटेडको अबको भिडन्त भने प्रिमियर लिगको लिडर चेल्सीसंग हुनेछ । युनाइटेड म्यानेजर होजे मौरिन्होले भने चेल्सीसंगको भिडन्तमा आफू नभइ चेल्सी नै दबाबमा रहेको प्रतिक्रिया दिएका छन् ।
उनले भने, ‘दबाबमा हामी हैन चेल्सी छ किनकि लिग लिडर चेल्सी हो ।’
एफए कपको अर्को खेलमा टोटनह्यामले फुल्हमलाई ३–० ले हरायो । वान साइडेड खेल प्रदर्शन गरेको टोटनह्यामका लागि ह्यारी केनले ह्याट्रिक गरे ।
टोटनह्यामको अबको भिडन्त मिल्वालसंग हुनेछ । मिल्वालले प्रिमियर लिगको डिफेन्डिङ च्याम्पियन लेस्टर सिटीलाई १–० ले हराएर क्वार्टरफाइनलमा ठाउँ बनाएको हो ।
