हेटौंडा। मकवानपुरमा रहेको विभिन्न क्याम्पसहरुमा सत्ता साझेदार दल नेपाली काँगे्रस, नेकपा माओबादी (केन्द्र) र राप्रपाका विद्यार्थी संगठनबीच गठबन्धन जुट्ने भएको छ । शनिबार विभिन्न क्याम्पसमा भएको मनोनयन दर्ता पछि सो गठबन्धन जुट्ने निश्चित भएको हो ।
शनिबार शान्तिपूर्ण रुपमा सम्पन्न भएको मनोनयन दर्तापछि त्यहाँका क्याम्पसहरु मनहरी बहुमुखी क्याम्पस, निर्मल बहुमुखी क्याम्पस, फरेस्टी क्याम्पस, हेटौंडा क्याम्पस, मकवानपुर बहुमुखी क्याम्पस, वंश गोपाल बहुमुखी क्याम्पस र पालुङ बहुमुखी क्याम्पसमा तीनदलका विद्यार्थी संगठनबीच गठबन्धन बन्ने पक्का भएको हो ।
त्यस्तै, ती क्याम्पसहरुमा एमालेको विद्यार्थी संगठन अनेरास्ववियु र नयाँ शक्तिको विद्यार्थी संगठनले पनि छुट्टाछुट्टै प्यानल बनाएर उम्मेदवारी दिएका छन् ।
यसरी अध्यक्षमा उम्मेदवारी दिने मध्ये मकवानपुर बहुमुखी क्याम्पसमा कुमार बहादुर केसी, निर बहादुर सिन्तान, श्रवण कुमार वर्तौला र लक्ष्मीकान्त पौडेल रहेका छन् । त्यस्तै, सचिवमा आकाश अधिकारी, शशिकला सिन्तान, अमृत बर्तौला र सविना लामाले उम्मेदवारी दिएको क्याम्पसले जनाएको छ ।
उता, हेटौंडा क्याम्पसमा अध्यक्षको लागि अनेरास्ववियुका उमेश पुरी र संयुक्त विद्यार्थी संगठनका तर्फबाट सुदीप बर्तौलाले उम्मेदवारी दिएका छन् । त्यस्तै, सचिवमा नवीन कुमार मिश्र र पूर्ण बहादुर नेपालीले उम्मेदवारी दिएका छन् । जसमध्ये मिश्र अनेरास्ववियु र नेपाली संयुक्त विद्यार्थी संगठनबाट हुन् । उता, कोषाध्यक्षमा मनोज सुनार र ज्ञानु लामाले उम्मेदवारी दिएका छन् । सुनार अनेरास्ववियु र लामा संयुक्त प्यानलबाट उम्मेदवारी दिन लागेका हुन् ।
त्यस्तै वनविज्ञानमा अध्यक्षको लागि विमल केसी खत्री, पवन कुमार खरेल, मनोज सुवेदी, जीवन पोखरेल र हेमचन्द्र जोशी रहेका छन् । त्यस्तैगरी सचिवमा उम्मेदवारीदिनेहरुमा विक्रम सिंह, पदम प्रसाद जैशी र सन्देश घिमिरे रहेका छन् ।
कोषाध्यक्षमा सुस्मिता हमाल र सलिना राई र सिलि घिमिरेले उम्मेदवारी दिएका छन् । जसमध्ये राई मोहन बैद्य निकट विद्यार्थीबाट, हमाल संयुक्त प्यानलबाट र घिमिरेले अनेरास्ववियुबाट उम्मेदवारी दिएका हुन् ।
