काठमाडौं । कञ्चनपुरमा भारतीय सुरक्षाकर्मीको गोली लागेर गत बिहीबार नेपाली युवा गोविन्द गौतमको मृत्यु भएपछि भारतीय ज्यादती र अत्याचारको विरोधमा शनिबार नेत्रविक्रम चन्द विप्लव नेतृत्वको नेपाल कम्युनिष्ट पार्टीले नेपाल बन्दको आव्हान गरेको छ ।
तर सो बन्दको भने काठमाडौं उपत्यकामा खासै प्रभाव परेको छैन । बिहानको समयमा विभिन्न यातायात व्यवसायी समितिले गाडीलाई क्यूमा राख्न नमाने पनि त्यसपछि भने निर्वाध रुपमा सवारी साधन चलेका छन् ।
बजार पनि खुलेको छ । शनिबार भएकाले र वर्षा पनि भएकाले भने सवारीको चाप बाक्लो भने छैन ।
राजधानीबाट बाहिरिने र भित्रने सवारीसाधन पनि नियमित रुपले संचालन भइरहेको प्रहरीले जनाएको छ ।
भारतीय सुरक्षाकर्मीले नेपाली भूमिमा आएर नेपालीमाथि नै गोली हान्दा पुष्पकमल दाहाल प्रचण्ड सरकार रमिते बनेको भन्दै विप्लव माओवादीले बन्द आव्हान गरेको हो ।