गुडिसन पार्क । इङलिश प्रिमियर लिग फुटबलमा एभर्टनले सफलता हासिल गर्दा स्वान्सी सिटी भने पराजित भएको छ । शनिबार राति भएको खेलमा एभर्टनले घरेलु मैदानमा गुडिसन पार्कमा वेष्टब्रोमविच आल्बियनलाई ३–० ले हरायो । केभिन मिराल्लास, मोर्गान स्नेइडर्लिन र रोमलु लुकाकुले गोल गर्दै एभर्टनलाई जिताएका हुन् ।
स्वान्सी सिटी भने हल सिटीसंग २–१ ले पराजित भएको छ । हल सिटीले घरेलु मैदानमा विजय हासिल गर्दै लिग तालिकाको १८ औं स्थानमा उक्लने अवसर पाएको हो । यो जितले हल सिटी रेलिगेशन टार्न आतुर देखिएको छ ।
यता अर्को खेलमा एएफसी बर्नमाउथले वेष्टह्याम युनाइटेडलाई ३–२ ले हराएको छ । बर्नमाउथलाई जिताउने क्रममा जोसुवा किंगले ह्याट्रिक गरे । यसअघि दुई पेनाल्टी भने बर्नमाउथले गोल गर्न चुकेको थियो । त्यसमा किंगको प्रहार पनि थियो । त्यसतै बेनिक अल्फोब पनि गोल गर्न चुके ।
लिग अन्तर्गत आइतबार राति ९ः४५ बजे लिभरपुलले बर्नलेसंग खेल्दैछ । साउथह्याम्पटन र म्यानचेष्टर युनाइटेड तथा चेल्सी र वाटफोर्डबीचको खेल भने स्थगित भएको छ ।
लिगमा २७ खेलबाट ६६ अंकसहित चेल्सी शीर्ष स्थानमा छ भने दोस्रो स्थानको टोटनह्यामको ५६ अंक छ ।
