काठमाडौं । इङलिश प्रिमियर लिग फुटबलको डिफेन्डिङ च्याम्पियन लेस्टर सिटीका स्ट्राइकर जामी भर्डीलाई मार्ने धम्की आएको छ । क्लवका पूर्व म्यानेजर क्लाउडियो रेनेरीलाई हटाउन भूमिका खेलेको आरोपमा उनलाई मार्ने धम्की आएको हो । भर्डीले यो घटनाले आफ्नो परिवारमा पनि तनाव सिर्जना भएको बताएका छन् ।
भर्डीले लेस्टरका सबैभन्दा सफल म्यानेजर रेनेरीलाई हटाउन आफ्नो कुनै भूमिका नरहेकोसमेत स्पष्ट पारेका छन् । लेस्टरले क्लवलाई ऐतिहासिक सफलता दिलाएको नौ महिनापछि गत महिना रेनेरीलाई हटाएको थियो । लेस्टर खस्किएपछि रेनेरीलाई हटाउने निर्णय गरेको थियो ।
च्याम्पियन्स लिग फुटबल अन्तर्गत राउण्ड अफ सिक्सटिनको खेलमा स्पेनिश क्लव सेभियासंग भोगेको हारपछि रेनेरीलाई हटाउने निर्णय भएको थियो । त्यतिबेला भर्डीले क्लव व्यवस्थापनसंग तीन घण्टा बसेर डोपिङ परीक्षणका विषयमा कुरा गरेका थिए ।
तर उनलाई सोही तीन घण्टामा व्यवस्थापनसंग रेनेरी हटाउनेबारेमा छलफल गरेको आरोपमा मार्ने धम्की आएको हो ।
भर्डीले उनकी श्रीमती र बच्चालाई पनि मार्ने प्रयास भएको जनाएका छन् ।
