काठमाडौं । विश्वकप छनोट फुटबलको युरोपेली क्षेत्र अन्तर्गत समूह एच को खेलमा बेल्जियम र ग्रीसले अंक बाँडेका छन् । बेल्जियमको मैदान कोनिङ बोउडेविन्सटाडियोनमा भएको खेलमा ४६ औं मिनेटमा ग्रीसका मिट्रोग्लुसले गोल गरे ।
६५ औं मिनेटमा टाचसिडिसले दोहोरो पहेंलो कार्ड पाउँदा ग्रीस १० जनामा समेटियो । खेलको ८९ औं मिनेटमा मात्र रोमेलु लुकाकुले गोल गर्दै बेल्जियमलाई बराबरी गोल दिलाए ।
इन्जुरी समयमा जाभेलासले दोहोरो पहेंलो कार्ड खाँदा ग्रीस ९ जनामा मात्र घटेन अबका खेलमा भने समस्या उब्जिएको छ ।
यो समूहको अर्को खेलमा बोस्निया हर्जगोविनाले जिब्राल्टारलाई ५–० ले हरायो । साइप्रस र इस्टोनियाले भने गोलरहित बराबरी खेले ।
पाँचौं चरणको समाप्तिसम्म बेल्जियम १३ अंकसहित शीर्ष स्थानमा छ भने ११ अंकको ग्रीस दोस्रो स्थानमा छ ।
१० अंकबाट बोस्निया तेस्रो तथा ४–४ अंकका साइप्रस र इस्टोनिया चौथो र पाँचौं स्थानमा छन् । जिब्राल्टारले अंकको खाता खोल्न सकेको छैन ।
