अपहरण काण्डमा सरकारी कर्मचारी र पत्रकार संलग्न, तीन पक्राउ, दुई फरार
प्रकाशित २०७३ चैत ३० बुधबार
435
Shares
काठमाडौं । झापा शनिश्चरेका जीवन विष्टलाई अपहरण गरी बन्धक बनाएर जमिन हडपेको आरोपमा प्रहरीले जिल्ला प्रशासन कार्यालय झापाका खरिदार तेजेन्द्र न्यौपानेसहित तीन जनालाई पक्राउ गरेको छ ।
विष्टको नामको अनारमनी ४ मा रहेको कित्ता नम्बर १६९ र १७० को करिब ५ कट्ठा १६ धुर जमीन मिलोमतोमा जबर्जस्ती हडपेको आरोपमा भद्रपुर ७ बस्ने न्यौपानेसहित मेचीनगर ८ बाहुनडाँगीका भूपू कान्छा भनिने अजय राई र भद्रपुर ७ बस्ने व्यावसायी प्रेम न्यौपानेलाई प्रहरीले आइतबार राति जिल्लाका विभिन्न स्थानबाट नियन्त्रणमा लिएको हो ।
जिल्ला प्रहरी कार्यालयका प्रहरी उपरीक्षक शैलेश थापाका अनुसार जग्गाधनी विष्टले आफूलाई अपहरण गरी बन्धक बनाएर जमीन हडपेको भन्दै गत शुक्रबार प्रहरीमा किटानी जाहेरी दिएका थिए ।
जाहेरीका आधारमा प्रहरीले तीनजनालाई पक्राउ गरेको हो ।
उपरीक्षक थापाका अनुसार घटनामा संलग्न पत्रकारसहित दुई आरोपी फरार छन् ।
फरार अभियुक्तको नाम प्रहरीले सार्वजनिक गरेन । (कान्तिपुर दैनिक)
