नयाँदिल्ली । मित्र राष्ट्र भारतको राजकीय भ्रमणमा राजधानी नयाँ दिल्ली पुगेकी राष्ट्रपति विद्यादेवी भण्डारीसँग भारतीय राष्ट्रपति भवनमा भारतका विभिन्न राजनीतिक दलका नेताले भेट गरेका छन् ।

भारतीय समकक्षी प्रणव मुखर्जीको औपचारिक निमन्त्रणामा सोमबार अपराह्न नयाँ दिल्ली पुगेपछि राष्ट्रपति भण्डारीसँग नयाँ दिल्लीका मुख्यमन्त्री अरवीन्द केजरीवाल, भारतीय कम्युनिस्ट पार्टी (मार्क्सवादी)का महासचिव सीताराम यचुरी, राष्ट्रवादी काँग्रेस पार्टीका महासचिव डिपी त्रिपाठी र जनता दल (युनाइटेड)का शरद यादवले अलग अलग भेट गरे ।

भेटमा राष्ट्रपति भण्डारीले आफ्नो भारत भ्रमणले दुई निकट छिमेकी देशबीचको सम्बन्ध अझै प्रगाढ र सुमधुर रहने विश्वास व्यक्त गर्दै नेपालमा लोकतन्त्र संस्थागत गर्न भारत र भारतीय जनताको हिजोका दिनमा जस्तै सहयोग र शुभेच्छा रहने अपेक्षा गरिन् ।

राष्ट्रपति भण्डारीसँगको भेटमा नेताहरुले नेपालमा शान्ति, स्थिरता र विकासमा आफूहरुको सदैव सहयोग र सहकार्य रहने प्रतिबद्धता व्यक्त गरेको भेटमा सहभागी परराष्ट्रमन्त्री प्रकाशशरण महतले जानकारी दिए ।  भारतीय नेताहरुले नेपालमा लोकतन्त्रको संस्थागत विकासका लागि निर्वाचनमार्फत संविधान कार्यान्वयन हुनुपर्नेमा जोड दिएको र यसमा आफूहरुको सदैव शुभेच्छा रहेको पनि बताए । उनीहरुले नेपालमा अझै पनि स्थिरता, विकास र लोकतन्त्रको संस्थागत विकास हुन नसकेकामा चिन्ता व्यक्त गर्दै निर्वाचनमार्फत मुलुक स्थिरतातर्फ जाओस् भन्ने कामना गरेका थिए ।

राष्ट्रपतिसँगको भेटपछि मार्क्सवादीका महासचिव यचुरीले नेपाल संविधान निर्माणपछि यसको कार्यान्वयनको ऐतिहासिक मोडमा रहेका बेला राष्ट्रपतिको ठूलो जिम्मेवारी रहेकाले चुनावमार्फत संविधान कार्यान्वयन होस् र आधुनिक नेपाल विकासको मार्गमा अगाडि बढोस् भन्ने आफूले शुभकामना व्यक्त गरेको बताए ।

भेटमा परराष्ट्रमन्त्री महत, शान्ति तथा पुनःनिर्माण मन्त्री सीतादेवी यादव, भारतका लागि नेपाली राजदूत दीपकुमार उपाध्याय, परराष्ट्र मन्त्रालयका सचिव शङ्करदास वैरागी, शिष्टाचार महापाल दीपक अधिकारीलगायत उच्चपदस्थ अधिकारीको सहभागिता थियो ।

यसअघि राष्ट्रपति भण्डारीलाई इन्दिरा गान्धी अन्तर्राष्ट्रिय विमानस्थलमा भारतका महिला तथा बालविकास मामिला राज्यमन्त्री कृष्णाराज, भारतीय विदेश मन्त्रालयका शिष्टाचार महापाल सञ्जय बर्मा, नेपालका लागि भारतीय राजदूत मन्जीवसिंह पुरीलगायतले स्वागत गेका थिए । रासस