-
-
-
-
वेम्बले । आर्सनल एफए कप फुटबलको फाइनलमा प्रवेश गरेको छ । आइतबार राति भएको सेमिफाइनलमा म्यानचेष्टर सिटीमाथि २–१ को जित हासिल गर्दै आर्सनल फाइनलमा पुगेको हो ।
वेम्बले रंगशालामा भएको खेलको ६२ औं मिनेटमा सर्जिओ अगुएरोले गोल गर्दै म्यानचेष्टर सिटीलाई अग्रता दिलाए ।
७१ औं मिनेटमा नाचो मोन्रियलले गोल गर्दै आर्सनललाई बराबरीमा ल्याए । निर्धारित ९० मिनेटसम्म १–१ को बराबरी भयो ।
त्यसपछि थपिएको ३० मिनेटको अतिरिक्त समयमा १०१ मिनेटमा एलेक्सिस सान्चेजले गोल गर्दै आर्सनललाई जिताए ।
यो जितसंगै आर्सनल म्यानेजर आर्सेन वेंगरको अर्को सिजन पनि सुरक्षित भएको चर्चा चल्न थालेको छ ।
अब फाइनलमा आर्सनलको भिडन्त चेल्सीसंग हुनेछ । चेल्सीले सेमिफाइनलमा टोटनह्याम हटसपरलाई ४–२ ले हराएको थियो ।
