उपप्रधानमन्त्री कमल थापा शीतलनिवासमा, राप्रपाको बैठक ४ बजे
प्रकाशित २०७४ वैशाख १८ सोमबार
321
Shares
काठमाडौं । बैठककै बीचमा अध्यक्ष कमल थापा राष्ट्रपति विद्यादेवी भण्डारीलाई भेट्न गएपछि राप्रपाको विहानैदेखि सुरु भएको कार्यसम्पादन समितिको बैठक स्थगित भएको छ । दिउँसो १ बजेको लागि अध्यक्ष कमल थापालाई राष्ट्रपति भण्डारीले बोलाएपछि बैठक अपराह्न ४ बजेसम्मको लागि स्थगित गरेर उनी राष्ट्रपति कार्यालयतिर लागेको राप्रपा महामन्त्री ध्रुव बहादुर प्रधानले जानकारी दिए ।
उनका अनुसार अहिलेसम्मको कार्यसम्पादन समितिको बैठकमा बोल्ने नेताहरुले आकस्मिक रुपमा आश्चर्यजनक ढंगले महाभियोग प्रस्ताव संसद्मा दर्ता गरिएको भन्दै सरकारबाट फिर्ता हुनुपर्ने पक्षमा अधिकांश वक्ताहरुले जोड दिएका छन् । तर, संसद् विघटनको सूचना पछि केही जानेबुझेका सांसद्हरु भने सो विषयमा सहमत हुन सकेका छैनन् ।
विहान नौ बजे प्रधानमन्त्री पुष्पकमल दाहालसँग छलफल गरेकी राष्ट्रपति भण्डारीले १ बजे उपप्रधानमन्त्री समेत रहेका थापासँग कुराकानी गरेकी हुन् । बैठकमा समसामयिक विषयका साथै आसन्न स्थानीय तहको निर्वाचनको विषयमा पनि छलफल गरिएको राष्ट्रपतिका स्वकीय सचिव शिव भट्टराईले जानकारी दिए ।
