औषधि आपूर्ति रोके कारबाही गर्ने संघको चेतावनी

निहीत स्वार्थमा औषधि आपूर्ति रोक्न चलखेलः अध्यक्ष श्रेष्ठ

प्रकाशित मिति : २०७४ बैशाख २९ शुक्रबार , २,१९६ पटक हेरिएको

काठमाडौं। नेपाल औषधि व्यवसायी संघले निहीत स्वार्थमा केही व्यवसायीहरुले औषधि आपूर्ति रोक्ने चलखेल भएको आरोप लगाएको छ । केही महिनाअघिमात्रै गठन भएको नेपाल औषधि आयातकर्ता संघले औषधि आयात ठप्प बनाउने चेतावनी दिए लगत्तै व्यवसायी संघले कडा आपत्ति जनाएको हो ।

२०३० सालमा स्थापना भएको नेपाल औषधि व्यवसायी संघ देशभरका व्यवसायीहरुको छाता संगठन हो । स्वास्थ्य मन्त्रालयले औषधीलाई सस्तो बनाउन गृहकार्य शुरु गरे लगत्तै केहि व्यवसायी स्वास्थ्यमन्त्री र मन्त्रालय विरुद्ध उत्रिएका थिए।

जीवन मरणसँग प्रत्यक्ष सरोकार राख्ने औषधि जस्तो अति संवेदनशील एवं अत्यावश्यकीय वस्तुको आयात नै ठप्प बनाउने चेतावनी मानवीय मूल्य मान्यताविपरीत रहेको संघको भनाइ छ । ‘यसरी आम उपभोक्ताहरुको स्वास्थ्यसँग सम्बन्धित अत्यावश्कीय वस्तु औषधिमा नेपाल औषधि व्यवसायी संघको नीति विपरीत भ्रमपूर्ण समाचारहरु आउनुलाई नेपाल औषधि व्यवसायी संघले गैर जिम्मेवारीपूर्ण कार्यको रुपमा लिएको छ,’ संघका अध्यक्ष मृगेन्द्रमेहर श्रेष्ठद्वारा जारी विज्ञप्तीमा भनिएको छ । संघको निजी पहलमा भूकम्प र नाकाबन्दीमा पनि औषधि अभाव भएको थिएन ।

संघको विधानको मर्म र भावना विपरीत कार्य गरेका केही असन्तुष्ट समूहले आफ्नो निहीत स्वार्थको लागि मनोमानी ढंगले औषधिको सरल आपूर्तिलाई असर पर्ने गरी प्रचारबाजी गरेको भन्दै ती व्यवसायीलाई कारबाही गर्ने विज्ञप्तीमा चेतावनी दिइएको छ । ‘साथै आयातित सम्पूर्ण औषधिहरु पूर्ववत व्यवस्था अनुसार नै आयात हुने र सहज रुपमा बिक्री वितरण गरिरहने व्यहोरा समेत जानकारी गराउन चाहन्छौं,’ विज्ञप्तीमा भनिएको छ ।
 

नयाँ