भारतद्वारा दुई चरणको सफल निर्वाचनकालागि नेपाललाई बधाई
प्रकाशित २०७४ असार २० मंगलबार
382
Shares
काठमाडौँ। उपप्रधानमन्त्री कृष्णबहादुर महरा र भारतका विदेश मामिलामन्त्री सुष्मा स्वराजबीच नयाँ दिल्लीमा भएको भेटमा हालका दिनहरुमा नेपाल–भारत सम्बन्धले राम्रो प्रगति गरिरहेको र दुई देशबीचको मैत्री सम्बन्ध विभिन्न तहमा भएको भ्रमणले अझ बढी सुदृढ भएको विचारको आदानप्रदान भएको छ ।
भारतीय विदेशमन्त्री स्वराजले नेपालमा स्थानीय तहको दुई चरणको निर्वाचन सफलतापूर्वक सम्पन्न भएकामा नेपाल सरकारलाई बधाई दिएकी छिन । नेपाली संविधान कार्यन्वयनमा लागेकोमा पनि उनले खूशी ब्यक्त गरिन्।
दुवै नेताहरुले दुई देशबीचको विकास सहयोग, व्यापार र पारवहन, सीमापार पूर्वाधार, जलविद्युत् परियोजनालगायत विषयमा विस्तृत समीक्षा र छलफल गरिएको नयाँ दिल्लीस्थित नेपाली राजदूतावासले जनाएको छ ।
सो अवसरमा परराष्ट्रमन्त्री महराले नेपालको सामाजिक, आर्थिक विकासका लागि भारत सरकारले गरेको सहयोगप्रति धन्यवाद दिएका थिए ।
विदेशमन्त्री स्वराजले आजै उपप्रधानमन्त्री महराको सम्मानमा रात्रि भोजको आयोजना गर्नुभयो । मन्त्री महरा मङ्गलबार अपराह्न स्वदेश फर्कने कार्यक्रम छ ।
