- सुन चाँदी दर
- विनिमय दर
- नेपाली पात्रो
- राशिफल
रुपन्देही । रुपन्देहीको देवदह नगरपालिका –६ खैरेनी बजारमा विषाक्त भोजनका कारण ३२ जना एकैपटक बिरामी परेका छन् ।
स्थानीय सन्तनारायण विकको घरमा सोमबार श्राद्ध खान गएका आफन्तहरु एकपछि अर्को अस्वस्थ भएपछि उपचारका लागि लुम्बिनी अञ्चल अस्पताल बुटवलमा लगिएको छ ।
अस्पतालका निमेसु डा राजेन्द्रप्रसाद खनालका अनुसार दुई दिन सम्म देवदहमा उपचार सम्भव नभएपछि अञ्चल अस्पतालमा ३२ जना बिरामी आएको बताए ।
मङ्गलबार २३ जना र वुधबार थप नौ जना उपचारका लागि अस्पताल भर्ना भएका छन् । उनीहरुमध्ये एक जनाको अवस्था गम्भीर रहेको बताइएको छ ।
आफूहरुले पुरी, तरकारी, काँक्रोको अचारलगायतका परिकार खाएका अस्पतालमा भर्ना बिरामीले बताएका छन् । उनीहरुमा ज्वरो आउने, झाडापखाला लाग्ने जस्ता समस्या देखिएको बताइएको छ । अझै केहीले अस्पताल भर्ना हुन पाएका छैनन् ।
बिरामी पर्नेमा देवदह –६ की ५५ वर्षीया ज्योति विक, १३ वर्षीया स्मृति विक, ४० वर्षीया लीला विक, १७ वर्षीया जानकी विक, छ वर्षीया सलिना विक, १२ वर्षीय अजित विक, १० वर्षीय मनिष विकलगायत छन् ।