मलेसिया । मलेसियामा भइरहेको एसीसी यू–१९ इस्टर्न रिजन क्रिकेट प्रतियोगिताको दोस्रो खेलमा अहिले नेपालले भुटानसंग खेलिरहेको छ । जितका लागि नेपालले जम्मा ५१ रनको न्युन लक्ष्य पाएको छ ।
खेलमा टस जितेर भुटानले ब्याटिङ गरेको थियो । भुटानले २८ ओभर क्रिजमा टिकेर मात्र ५० रन बनायो ।
२ भुटानीले मात्र दोहोरो अंक जोडे । कप्तान टोसी फुन्टुसोले १६ तथा युगेन दोर्जीले १३ रन बनाए ।
कप्तान दिपेन्द्र सिंह ऐरीले कप्तानी इनिंग खेल्ने क्रममा ८ ओभरमा २३ रन खर्चेर ५ विकेट लिए ।
पहिलो खेलमा थाइल्याण्ड विरुद्ध ७ विकेट लिएका सन्दिप लामिछानेले ७ ओभरमा ७ रन खर्चेर ४ विकेट लिए ।
पहिलो विकेट नन्दन यादवले लिएका थिए ।
यसअघि भएको पहिलो खेलमा नेपालले थाइलैण्डलाई २५५ रनले पराजित गरेको थियो । सन्दिप लामिछानेले ७ विकेट लिएपछि थाइलैण्ड १० ओभरमा मात्र २६ रनमा समेटियो ।
यसअघि टस हारेर ब्याटिङ गर्न पुगेको नेपालले निर्धारित ५० ओभरमा ६ विकेट गुमाएर २८१ रन बनाएको थियो ।
अनिलकुमार साहले सर्वाधिक ९१ तथा प्रनित थापा मगरले ५० रन बनाएका थिए ।
प्रतियोगिताको समूह ‘ए’ मा रहेको नेपालले बिहीबार सिंगापुरसंग खेल्नेछ ।
समूह ‘बी’ मा मलेसिया, हङकङ, चीन र म्यानमार छन् ।
फाइनल पुग्ने टोली यू–१९ एसिया कपका लागि छनोट हुने छ ।
बुधबारको अर्को खेलमा म्यानमारले चीनलाई १० विकेटले हरायो ।
![nepal-bhutan].jpg](/frontend/images/default.png)
