आपूर्ति मन्त्रीले भने–‘जग्गा खरिदमा अनियमितता गर्ने खड्काका साथी अरु पनि छन्’

प्रकाशित २०७४ असोज ४ बुधबार

काठमाडौं । आपूर्तिमन्त्री शिवकुमार मण्डलले नेपाल आयल निगमको जग्गा खरिदमा भएको भनिएको अनियमिततामा कार्यकारी निर्देशक गोपाल खड्का मात्रै नभई अरु पनि सलंग्न रहेको बताएका छन् ।

उनले संलग्न सबैलाई कारवाही गर्ने समेत बताएका छन् । बुधबार रिपोर्टर्स क्लबको साक्षात्कारमा मन्त्री मण्डलले भने, ‘जग्गा खरिद प्रकरणमा चरम भ्रष्टाचार भएको छ, यसबारे हामी थप अनुसन्धान सुरु गर्छौं, यसको सम्पूर्ण तयारी भैसकेको छ ।’ यसबारे सुक्ष्म अध्ययन गरिरहेको मन्त्री मण्डलले बताएका छन् ।

मन्त्री मण्डलले अगाडि भने, ‘म कसैको नाम र कुनै पार्टीको नाम लिन चाहन्नँ, कानुनले दोषी ठहर भएका कुनै व्यक्तिलाई मन्त्रीको हैसियतमा म छोड्दिनँ, धेरै मान्छेको प्रत्यक्ष संलग्नता रहेको र केही ठूला व्यक्तिहरुको पनि हात रहेको सूचना पाएको छु, त्यसैले यस काण्डमा दोषी भेटिएका जोसुकैलाई कानुन अनुसार कारबाही गर्ने विश्वास दिलाउँछु ।’

उनले भने, ‘झापाका जग्गाधनीले मलाई भेटेर भन्नुभएको छ, सुरुमा २ लाख ५० हजार, ३ लाख र ३ लाख ५० हजार मूल्यमा बिक्री गरेको कुरा उहाँहरुले मलाई भन्नुभएको छ, सुक्ष्म अध्ययन र अनुगमन सुरु गरेका छौँ, जोसुकै यस भ्रष्टाचारमा पर्छ त्यो व्यक्तिलाई कारबाही हुन्छ, कसैलाई पनि छोडिने छैन ।’

उनले खाद्यान्नमा मूल्य नियन्त्रण गर्न कुनैपनि कसर बाँकी नराख्ने प्रतिबद्धता जनाए । उपभोक्ताको माग अनुसार मन्त्रालय अन्तर्गतका संस्थानहरुले सुपथ मूल्यका पसलहरु अहिले सञ्चालन गरेको जानकारी दिँदै मन्त्री मण्डलले भने, ‘सरकार नभएको जसरी मूल्य बढाउने, कानुनको पालना नगर्ने, राज्यलाई कर नर्तिने त्यस्ता व्यवसायीहरुलाई मन्त्रालयले कानुन छ भन्ने अनुभुत गर्नको लागि निरन्तर अनुगमन गर्नेछ, यो अनुगमनलाई मौसमी भनेर कसैले सोच्छ भने त्यो भम्र हो, जनताको पक्षमा निरन्तर काम गर्ने भनेर नै हामीले जिम्मेवारी सम्हालेका हौं ।’ मन्त्री मण्लले अनियमितताको गहिराइसम्म पुग्ने समेत सुनाएका छन् ।