पोखरा । यही मंसिर २१ गते हुने प्रतिनिधिसभा र प्रदेश सभाको निर्वाचनमा नेपाली काँग्रेसले मैदानमा उतोरका उम्मेद्वारहरु आफ्नो पक्षमा भोट माग्दै मतदाताको घरदैलोमा पुगेको छन् । 

लोकतन्त्रको रक्षासहित सम्बृद्धिको नारा लिएर मतदातासामु पुगेका काँग्रेसका उम्मेद्वारहरु मतदाताले यसपटक न्याय गर्नेमा निश्चिन्त देखिएका छन् ।

कास्की क्षेत्र नम्बर १ मा कानुनमन्त्रीसमेत रहनुभएका काँग्रेस नेता यज्ञबहादुर थापा प्रदेश सभा र समानुपातिक तर्फका उम्मेदवारहरुको टोली लिएर मतमाग्न निस्केका छन् । 

मन्त्री थापा , क्षेत्र नं १ को प्रदेश ‘ख’ का उम्मेदवार कृष्ण केसी र समानुपातिक उम्मेदवार रसकुमारी गुरुङ सहितको टोली काँग्रेसको पक्षमा भोट माग्दै मादी गाउँपालिकाको विभिन्न वडाहरुमा पुगेर बुधबार पोखरा फर्केको छ । 

बुधबार फर्केको टोलीको विहिबारदेखि पोखरा लेखनाथ महानगरपालिकामा पर्ने विभिन्न वडाहरुमा घरदैलो गर्ने कार्यक्रम रहेको छ । 

प्रचारको क्रममा जनताको घरदैलोमा पुगेका थापाले  कांग्रेसप्रति मतदाताको असिम विश्वास र सद्भाव रहेको सुनाए । 

अघिल्लो पटक पनि त्यस क्षेत्रका जनताले आफूलाई निर्वाचित गराएको स्मरण गराउदै उनले भने ‘जनमत काँग्रेसकै पक्षमा छ । र, जनताले सम्बृद्धिको अभियान काँग्रेसले मात्र पूरा गर्न सक्ने विश्वास गरेका छन् ।’ 

त्यस्तै प्रदेश ‘ख’ तर्फका उम्मेदवार कृष्ण केसीले पनि जनलहर काँग्रेसको पक्षमा रहेको बताए । 

‘हामी कास्की क्षेत्र नम्बर १ मा पर्ने मादी गाउँपालिकाका सम्पूर्ण गाऊँहरुमा घरदैलो कार्यक्रममा सरिक भयौँ । र, त्यहाँका जनताबाट निकै माया पनि पायौँ ।’ 

उनले केहि सम्बृद्धिको आशासहित मतदाताले काँग्रेसलाई जिताउने वचन दिएको बताए ।

त्यस्तै समानुपातिक तर्फकी उम्मेदवार रसकुमारी गुरुङले पनि काँग्रेसको पक्षमा जनलहर उर्लेको बताइन् । 

त्यस्तै नेपाली कांग्रेसका केन्द्रीय सदस्य  तथा प्रदेश ‘क’ तर्फका उम्मेदवार जीवन परियारले आफू प्रदेश (क)को क्षेत्रमा पर्ने सम्पूर्ण वडाहरुमा घरदैलो अभियानमा सरिक रहेको जानकारी दिए । 

कास्की क्षेत्र नम्बर २ प्रदेश  ‘क’ तर्फका उम्मेदवार गुरुप्रसाद बराल भरतपोखरीलाई केन्द्र बनाएर अहिले चुनावी प्रचारमा जुटेका छन्।  

भरतपोखरी क्षेत्रका सबै वस्तीहरुमा मतदाताहरुको घरघरमा पुगेर उनले नेपाली काँग्रेसको पक्षमा मत मागिरहेका छन् ।

उनले निर्वाचित भएपछि आफ्नो सम्पूर्ण सामर्थ्य त्यस क्षेत्रको विकास र निर्माणमा लगाउने प्रतिबद्धता नाएको उल्लेख गर्दै भरतपोखरीबासीले काँग्रेसको पक्षमा मत दिने विश्वास व्यक्त गरे।

बराल ग्रामिण भगमा मत माग्न व्यस्त रहँदा शहरी भेगमा भने उनको मत रोवोर्टले पनि मागिरहेको छ।