कैलालीको नदी कटान र डुबान समास्या समाधान गर्छु : आरजु
प्रकाशित २०७४ मंसिर १८ सोमबार
103
Shares
कैलाली । कैलाली निर्वाचन क्षेत्र नं ५ बाट प्रतिनिधिसभा सदस्यका उम्मेदवार एवं काँग्रेस नेत्री डा आरजु राणा देउवाले कैलालीको नदी कटान र डुबान समस्याको दीर्घकालीन समाधानका लागि लागिपर्ने बताएकी छन् ।
नेपाल प्रेस युनियन कैलाली शाखाले सोमबार आयोजित पत्रकार सम्मेलनमा नेत्री राणाले यहाँका विकासका चुनौती र सम्भावना बुझेर नै आफू चुनावी मैदानमा होमिएको बताइन् ।
कैलालीमा ऐलानी पर्ती जग्गामा दशकौंदेखि बसेका जनताले पूर्जा नपाएको उल्लेख गर्दै उनले भनिन् ,–“गौरीफण्टा नाकाको स्तरबृद्धि, महिला सशक्तिकरण, सांस्कृतिक संग्रहलाय निर्माण, स्तरीय सडक विस्तार, शिक्षा र स्वास्थ्य क्षेत्रको विकासलगायतका काम गर्नेछु ।”
विगतका विकास र निर्माणका कामलाई तीव्ररूपमा अघि बढाउने प्रतिबद्धता व्यक्त गर्दै नेत्री राणाले आगामी निर्वाचन लोकतन्त्र र साम्यवादबीचको जनमतसंग्रह भएकाले मतदातासंग लोकतन्त्रको संस्थागत विकासका लागि भोट हाल्न आग्रह गरिन् ।
उनले कैलालीमा कृषि क्षेत्रको आधुनिक र व्यावसायिकताका लागि रासायनिक मल कारखाना स्थापना गर्ने घोषणा गर्दै गदरियामा कृषि क्याम्पस स्थापना गर्न पहल गर्ने पनि प्रतिबद्धता व्यक्त गरिन् ।
आफ्नै पहलमा सेती अञ्चल अस्पताललाई ३०० श्ययाको बनाइ स्तरोन्नती गर्न लागिएको पनि उनले जानकारी दिइन् ।
