मोदी ओलीलाई स्वागत गर्न आँतुर, अहिले नै भ्रमणको निम्तो

सरकार गठन लगत्तै ओलीले मोदीलाई चिठी लेख्ने

प्रकाशित २०७४ पुष ६ बिहिबार

काठमाडौं । भारतीय प्रधानमन्त्री नरेन्द्र मोदीले एमाले अध्यक्ष केपी शर्मा ओलीलाई भारत भ्रमणको निम्तो दिएका छन् । अपराह्न अध्यक्ष ओलीलाई मोदीले टेलिफोन गरी हालै सम्पन्न निर्वाचनमा वाम गठबन्धनले ठूलो सफलता प्राप्त गरेकामा खुशी व्यक्त गर्दै बधाई सहित भ्रमणको निम्तो दिएका हुन् ।

भारतीय प्रधानमन्त्रीले पूर्वप्रधानमन्त्री ओलीसँग नेपालमा तीन वटै निर्वाचन सम्पन्न भएकामा खुशी जनाए । मोदी र ओलीबीचको टेलिफोन कुराकानीबारे जानकारी दिन केन्द्रीय सचिवालय सचिव प्रदीपकुमार ज्ञवालीले विज्ञप्तिमा नै जारी गरेका छन् ।

अध्यक्ष ओलीलाई बधाई तथा शुभकामना दिँदै मोदीले यस सफलताले नेपालमा लोकतन्त्रलाई सुदृढ बनाएको तथा निर्वाचनमा हासिल परिणाम र गठबन्धनको जीतले नेपालमा राजनीतिक स्थायित्व कायम भई आर्थिक विकास हुने विश्वास लिएको जनाइएको छ ।

भारतीय प्रधानमन्त्रीले सरकार गठनलगत्तै भारत भ्रमणका लागि अध्यक्ष ओलीलाई निमन्त्रणा गर्दै आफू स्वागत गर्न आतुर रहेको र नयाँ सरकारसँग सहकार्य गर्न प्रतीक्षारत रहेको बताएको बताइएको छ ।

अध्यक्ष ओलीले भारतीय प्रधानमन्त्रीलाई आफूलाई प्राप्त बधाई तथा शुभकामनाका लागि धन्यवाद दिँदै आफ्नो ध्यान राजनीतिक स्थायित्व, लोकतन्त्रको सुदृढीकरण, सुशासन र आर्थिक विकासमा केन्द्रित रहेको बताएको विज्ञप्तिमा जनाइएको छ । “यसका लागि छिमेकीसँग सुसम्बन्ध कायम गरिनेछ ”, ओलीले भनेका छन् ।

ओलीले खासगरी भारत र चीनसँग शान्ति र समृद्धिका लागि सहकार्य गरिने बताउँदै भारतीय प्रधानमन्त्री मोदीलाई पनि नेपाल भ्रमणका लागि निमन्त्रणा दिए । सरकार गठनलगत्तै नेपाल भ्रमणका लागि औपचारिक निमन्त्रणापत्र पठाइने ओलीले बताए ।

अध्यक्ष ओलीले गुजरातलगायत प्रान्तमा हालै सम्पन्न निर्वाचनमा प्राप्त सफलताका लागि भारतीय जनता पार्टीका नेता मोदीलाई पनि बधाई दिए ।