सरकारले पेश गरेको राष्ट्रिय सभा अध्यादेश स्वीकृत, गलिन् राष्ट्रपति, एमाले विफल
प्रकाशित २०७४ पुष १४ शुक्रबार
153
Shares
काठमाडौं । दुई महिनासम्म अड्काएर अन्ततः राष्ट्रपति विद्यादेवी भण्डारीले सरकारले पेश गरेको राष्ट्रिय सभा निर्वाचन अध्यादेश स्वीकृत गरेकी छिन् ।
नेकपा एमालेले कुनै पनि हालतमा सरकारले पेश गरेको एकल संक्रमणीय प्रक्रियाबाट राष्ट्रिय सभा गठन गर्ने निर्णय नस्वीकार्न दबाब दिएसंगै राष्ट्रपतिले अध्यादेश स्वीकृत नगरी अड्काएर राखेकी थिइन् ।
तर ‘हलो अड्काएर गोरु चुट्ने’ प्रयास असफल भएपछि उनले वाध्य भएर अध्यादेश स्वीकृत गरेकी हुन् ।
यसअघि नेपाली काँग्रेस नेतृत्वको सरकारले अध्यादेश स्वीकृत गर्न दबाब दिइरहेको थियो भने अन्य दलहरुले पनि अध्यादेश अड्काएर राख्न नमिल्ने बताउँदै आएका थिए ।
माओवादी केन्द्रले भने मध्यमार्ग अपनाउन आग्रह गरेको थियो ।
प्रधानमन्त्री शेरबहादुर देउवासंग शुक्रबार बिहान भएको छलफल सकिएपछि राष्ट्रपति भण्डारी जस्ताको तस्तै अध्यादेश प्रमाणीकरण गर्न वाध्य भएकी हुन् ।
विवादित अध्यादेशमा सहमतिका लागि निरन्तर प्रेरित गर्दा पनि दलहरुबीच सहमति नदेखिएपछि भण्डारी बिहीबारै स्वीकृत गर्ने मनस्थितिमा पुगेकी थिइन् ।
नयाँ सरकारको नेतृत्व गर्न आतुर देखिएको एमाले भने विफल देखिएको छ । एमालेले बहुमतीय प्रक्रियाबाट राष्ट्रिय सभा गठन हुनुपर्ने अडान राख्दै आएको थियो ।
