आयोगले दलहरुलाई भन्यो –तत्काल चुनावको खर्च विवरण बुझाउ
प्रकाशित २०७४ माघ १५ सोमबार
252
Shares
काठमाडौं । निर्वाचन आयोगले खर्च विवरण नबुझाएका उम्मेदवारहरुलाई तत्काल विवरण बुझाउन सचेत गराएको छ । आयोगले दोस्रो चरणको निर्वाचन परिणाम घोषणा भएको ३५ दिनभित्र खर्च विवरण बुझाउनु पर्ने कानुनी व्यवस्था अनुरुप उम्मेदवाहरुलाई खर्च विवरण बुझाउन सचेत गराएको हो ।
प्रदेश सभा सदस्य निर्वाचन ऐन अनुरुप दल, उम्मेदवार र प्रतिनिधिले निर्वाचन परिणाम घोषणा भएको ३५ दिनभित्र खर्च विवरण निर्वाचन आयोग अथवा तोकिएको कार्यालयमा बुझाउनु पर्ने व्यवस्था छ ।
आयोगले सूचना जारी गरेर प्रदेश सभा अन्तर्गत समानुपातिक निर्वाचन प्रणालीमा भाग लिएका सबै राजनीतिक दलहरुलाई आउँदो फागुन ८ गतेभित्र खर्च विवरण बुझाउन भनेको छ । गएको मंसिर १० र २१ गते भएको आम निर्वाचन अन्तर्गत प्रदेशको समानुपातिक निर्वाचनको मत परिणाम माघ ३ गते सार्वजनिक भएको थियो ।
यस्तै, आयोगले सूचनामार्फत सबै दलहरुलाई यही माघ मसान्तभित्र आ–आफनो दलको आय व्यय विवरण बुझाउन पनि आग्रह गरेको छ । आयोगले राजनीतिक दल सम्बन्धि ऐन अनुसार आय व्यय विवरण बुझाएको १ महिना भित्र विवरण सार्वजनिक गर्न समेत भनेको छ ।
