arrow

प्रदेशसभा बैठकका लागि बुटवलमा तयारी शुरु

logo
भरत केसी,
प्रकाशित २०७४ माघ १७ बुधबार

बुटवल ।  प्रदेशसभाको नयाँ संरचना अनुसार प्रदेश नं ५ को पहिलो बैठक यही माघ २१ गते बस्दै छ ।

प्रदेश नं ५ का प्रमुख उमाकान्त झाले नेपालको संविधानको धारा १८३ को उपधारा (१) बमोजिम बैठकको आह्वान गरेका छन् । प्रदेश नं ५ का मुख्यसचिव शंकर पाठक आफ्नो जिम्मेवारी सम्हाल्न बिहीबार यहाँ आइपुगेका छन् ।  

उनले क्षेत्रीय प्रशासन कार्यालय रहेका ठाउँको कर्मचारीलगायत भौतिक संरचनाको व्यवस्थापनमा समस्या नभएको तर रुपन्देहीमा प्रदेशको अस्थायी केन्द्र तोकिँदा अन्यत्रबाट कर्मचारी आउन केही ढिला भए पनि समयमै सबै ब्यवस्थापन हुने गरी काम भइरहेको बताए ।

प्रदेश नं ५ को बैठक बस्ने स्थल तोकिएको बुटवल उद्योग वाणिज्य संघको सचिवालय र सभाहलको संघीय संसद् सचिवालयले तोकेको मापदण्डबमोजिमको निर्माणको काम अघि बढाइएको छ । उक्त भवनमा शुधवार मात्र प्रदेशसभा सचिवालय र प्रदेशसभा बैठक भवनमा साइनबोर्ड राख्ने पहिलो काम भएको छ ।

बैठक कक्षमा संघीय संसद् सचिवालयले तोकेको मापदण्डबमोजिमको प्रदेशसभा बैठक कक्षको संरचनाको थालनी अझै शुरु हुन सकेको छैन । बैठक कक्षमा सभामुख, उपसभामुखलगायतको लबि छुट्याउनुपर्ने, मर्यादापालक, सभामुखको अगाडि दायाँतर्फ सत्ता पक्ष र बायाँतर्फ प्रतिपक्षका सदस्य बस्ने लबि तोकेर बनाउनुपर्ने, कार्पेटिङ गर्ने र कुर्सीको रङ समान गर्ने, दर्शकदीर्घा र संचारकर्मीका लागि अलगै स्थान तोकेर व्यवस्थापन गर्नेलगायत प्रारम्भिक कामको शुरुवात हुँदैछ ।

प्रदेशसभा कक्षको अगाडिको मञ्चमा सभामुख, सचिव र कर्मचारी बस्ने र सोही ठाउँमा रेकर्डिङ कक्षसमेत रहने गरी निर्माण गरिने छ । बैठकको रेकर्डिङ कक्ष निर्माणका लागि केन्द्रबाट खटिइआएका रेडियो नेपालका दुई जना प्रविधिज्ञले काम गरिरहेका छन् ।

सरकारले प्रदेशसभा बैठक सञ्चालनका लागि २७ जना कर्मचारी खटाइसकेको भएपनि हालसम्म कुनै कर्मचारी आइपुगेका छैनन् । संघीय संसद् सचिवालयका सहसचिव सुरेन्द्र अर्यालको नेतृत्वमा प्रदेशसभामा खटिएका कर्मचारीलाई सहजीकरण गर्न चार जनाको टोली तीन दिनअघि यहाँ आइपुगेको छ । कर्मचारीलाई सहजीकरण आएको टोली कर्मचारी नै कोही पनि नआइपुगेकाले आफैं बैठकको तयारीमा जुट्नु परेको टोली प्रमुख सहसचिव अर्याल बताए । उनले भने, “सहजीकरणभन्दा पनि अब त यो प्रदेशको पहिलो संसद् बैठकको सभा सञ्चालनलाई उत्कृष्ट बनाउने भनेर खटिएका छौँ ।”

बैठक सञ्चालनका लागि प्रदेश सांसद बस्नका लागि भनेर हाल बुटवल उपमहानगरपालिकाबाट केही कुर्सी ल्याएर समान रङका बनाउन शुरु गरिएको र दर्शक दीर्घामा बस्नेलाई समेत झन्डै १०० कुर्सीको व्यवस्थापन गर्नुपर्ने उनले बताए ।

बैठकलाई मर्यादित र उत्कृष्ट बनाउन आजै राष्ट्रिय पार्टीका स्थानीय नेतृत्वसँग सर्वदलीय बैठक सम्पन्न गरिएको उनले जानकारी दिए । संसदीय परम्पराअनुसार बैठक बस्नु अघि बैठकका एजेन्डा तय गर्न कार्यव्यवस्था समितिको बैठक बस्नुपर्ने हुन्छ । तर, हालसम्म कार्यव्यवस्था समिति नै गठन नभएकाले सर्वदलीय बैठकले एजेण्डा तय गर्न सहज हुने ठानेर नै बैठक आह्वान गरिएको उनले बताए  ।

प्रदेशसभाको पहिलो बैठक ज्येष्ठ सदस्य बलदेव शर्मा पोखरेलको अध्यक्षतामा बस्नेछ । सोही बैठकले सभामुख, उपसभामुखको चयनको मिति तय गर्नेछ । पहिलो बैठकको तयारी गर्ने सिलसिलामा ज्येष्ठ सदस्य पोखरेल आज पनि आफ्नै कार्यकक्षमा व्यस्त रहे । उनले सबै संरचना निर्माणमा प्रदेशसभाको संरचना नौलो र अनुभवको कमीका कारणले केही ढिलाइ भएको बताए  ।रासस

 



लोकप्रिय समाचार
लोकप्रिय समाचार
नयाँ