काठमाडौँ । पुँजी बजार अभौतिकीकरण गरेसँगै उकालो लागेको सेयर बजारको यो साता नेप्से परिसूचक ओरालो लागेको छ । गत साता नेप्से परिसूचक पहिलो दिनको तुलनामा ०.३२ अङ्कले बढेर अन्तिम दिन एक हजार २१२.३२ विन्दुमा पुगेको थियो । साताको नेप्से परिसूचक पहिलो दिनको तुलनामा ३.५१ अङ्कले घटेर अन्तिम दिन एक हजार २१६.११ अङ्कमा पुगेको छ । यस साता नेपाल स्टक एक्सचेन्जमा १२० कम्पनीको कारोबार भएको छ । जसअनुसार १० हजार ५०९ कारोबारबाट रु दुई अर्ब १८ करोड ६१ लाख ७४ हजार बराबरका ३४ लाख ४४ हजार ११७ कित्ता सेयर खरिद बिक्री भएका छन् ।
कारोबार रकम गत साताको भन्दा १२.६८ प्रतिशत कम हो । गत साता १०६ कम्पनीको कारोबार भएको थियो । जसअनुसार ११ हजार ९१९ कारोबारबाट रु दुई अर्ब ५० करोड ३७ लाख एक हजार बराबरका ३७ लाख ५८ हजार ६१० कित्ता सेयर खरिद बिक्री भएका थिए । वाणिज्य बैंक ४.७६, होटलको ६.७६, जलविद्युत्को १५.९५, बिमा ४०.८५ र अन्य समूहको परिसूचकमा ५.८७ अङ्कले ओरालो लागेको छ । विकास बैंक ७.०४, वित्त ०.२ र उत्पादनमूलक समूहको ५१.२७ परिसूचक अङ्कले उकालो लागेको छ भने व्यापार समूहको परिसूचकमा कुनै परिवर्तन भएको छैन ।
‘क’ वर्गका कम्पनीको कारोबार मापन गर्ने सेन्सेटिभ इन्डेक्स पहिलो दिनको तुलनामा ०.६६ अङ्कले घटेर २६१.५८ अङ्कमा आइपुगेको छ । यस साता कारोबार रकमको आधारमा सानिमा बैंक अग्रस्थानमा रहेको छ । त्यसैगरी कारोबार भएको सेयर सङ्ख्याको आधारमा र कारोबार सङ्ख्याको आधारमा पनि सानिमा बैंक अग्रस्थानमा रहेको छ ।
यस साता नेपाल स्टक एक्सचेन्जको कारोबार कक्ष नियमित कारोबारका लागि पाँच दिन खुला रह्यो । यस साता पनि ऋण पत्रतर्फ संस्थागत तथा सरकारी ऋण पत्रको कुनै पनि कारोबार भएन । त्यसैगरी फस्ट माइक्रोफाइनान्स डेभलपमेन्ट बैंकको तीन लाख कित्ता बोनस सेयर र शिखर इन्स्योरेन्स कम्पनीको रु पाँच लाख १० हजार ९८८ कित्ता सेयर सूचिकृत भएको छ ।
