त्रिशूली(नुवाकोट)। पूर्वप्रधानन्यायाधीश तथा राष्ट्रिय मानवअधिकार आयोगका पूर्वप्रमुख आयुक्त केदारनाथ उपाध्यायले सरकारले बेलैमा भूकम्पको समस्यालाई पहिचान गर्न नसक्दा झनै समस्या बल्झिँदै गएको बताए ।
सदरमुकाम विदुरमा आयोगका पूर्वआयुक्तहरुको समाज (फोकस एनएचआरसी) को आयोजनामा भएको भूकम्पपछिको स्थिति, अनुगमन, जवाफदेहिता, अभिवृत्ति र सामाजिक न्यायको सुनिश्चितता कार्यक्रममा फोकसका अध्यक्ष रहनुभएका उपाध्यायले सरकारी तहको असक्षताका कारण भूकम्प पीडितको सही सम्बोधन हुन नसकेको बताए । आयोगका पूर्वआयुक्त सुशील प्याकुरेलले समता कायम गराउन र गरिबीको विभेदलाई हटाउनु प्रमुख चुनौती रहेको बताए ।
प्रजिअ उमेशकुमार ढकालले नीतिगत रुपमा सरकारले स्पष्ट नपारेसम्म समस्या समाधानतर्फ नजाने बताए ।
स्थानीय विकास अधिकारी नारायणप्रसाद रिसालले भूकम्पपछिको क्षतिको आधिकारिक र विश्वसनीय तथ्याङ्क लिनका लागि टोली परिचालन गरिएको जानकारी दिए । कार्यक्रममा सहभागी विभिन्न क्षेत्रका व्यक्तिले भूकम्पपछिको पुनःनिर्माणका लागि स्पष्ट नीति र निर्माणलाई तत्काल थाल्न आग्रह गरेका थिए ।
