हुम्ला । आइतबार विहान देखि लगातार भएको हिमपातका कारण हुम्लाको जनजीवन कष्टकर भएको छ । हिमपातका कारण जिल्लाका उत्तरी भेकका बासिन्दाको जनजीवन कष्टकर भएको हो । जाडो अत्याधिक बढेको छ ।
जाडो बढेकाले स्थानीय घर बाहिर निस्कन नसक्ने भएकाले आवत जावतमा समेत कठिनाई भएको छ । पशु चौपायालाई चरनको समस्या भएको छ । हिमपातले सदरमुकाम सिमिकोट विमानस्थलको हवाई सेवा बन्द भएको छ । जिल्ला सदरमुकाम सिमिकोट र उत्तरी भेकका लिमी, मुचु खगालगाउँ, स्याँडा, हेप्कालगायत गाविसमा लगातार हिमपात भैरहेको छ ।
जिल्ला सदरमुकाम सिमिकोटमा १ फिट हिउँ जमेको छ । यसवर्ष पुष र माघ महिनामा हिमपात नहुँदा खडेरीले हिउँदे बाली सुकेर चिन्तित भएका कृषकहरु भने हर्षित भएका छन् । आकाशे पानीको भर पर्नु पर्ने भएकाले खडेरीले सुकेका बालीलाई हिमपातले राहत हुने स्थानीय कृषकहरुको भनाई छ ।
यो वर्ष पुस र माघ महिनामा हिमपात भएको थिएन । आइतबारबाट शुरु भएको हिमपात यस वर्षकै उच्च हिमपात हो । हिमपातका कारण जिल्लामा कुनैं प्रकारको क्षति भने, नभएको जिल्ला प्रहरी कार्यालय हुम्लाका प्रहरी नायव निरिक्षक ओम प्रकाश यादवले बताएका छन् ।
