काठमाडौं। तपाई मोटरसाईकलको उपभोगकर्ता हो ? या त तपाईले आगामी वर्ष नै कुनै नयाँ मोटरसाईकल त किन्दै हुनुहुन्छ ? यदि हुनुहुन्छ भने यो बुझिराख्नुहोस् कि तपाईले नयाँ मोटरसाईकल किन्दा र पुरानै मोटरसाईकल चढ्दा पनि तिर्दै आएको करमा सरकारले आर्थिक वर्ष २०७३÷७४ को लागि आर्थिक वर्ष २०७२-७३ को भन्दा भारी मात्रामा कर शुल्क बढाएको छ । अन्य सवारी साधनसँगै मोटरसाईकलमा आउँदो साउनदेखि सरकारले नयाँ मोटरसाइकल किन्दा ४२ प्रतिशतसम्म र पुराना मोटरसाईकलको वार्षिक सवारी शुल्कमा ५० प्रतिशतसम्म शुल्क बृद्धि गरेको हो।
आर्थिक वर्ष २०७२-७३ मा सरकारले नयाँ मोटरसाईकल खरिद गर्दा लिनेगरेको सडक निर्माण तथा सम्भार दस्तुरमा भारी बृद्धि गर्दै १ सय २५ सीसीको मोटरसाईकलमा १० हजार रूपैयाँ लाग्ने बताएको छ । जुन पहिलो पटक खरिद गर्दा लाग्ने रकम हो। यो रकम आर्थिक वर्ष २०७२÷७३ मा ७ हजार रूपैयाँ थियो।
त्यसैगरी, १ सय २६ देखि २ सय ५० सीसीसम्मको मोटरसाईकल नयाँ खरिद गर्दा अब उपभोक्ताले भन्सार महसुल बाहेक पनि १२ हजार रूपैयाँ तिर्नुपर्ने भएको छ। जुन यस भन्दा अगाडि ८ हजार मात्रै थियो। यसमा उपभोक्तालाई ४ हजार थप व्ययभार पर्ने भएको छ भने २ सय ५१ सीसीदेखि ४ सयसम्म र ४ सयदेखि माथिसीसीका मोटरसाईकलको खरिदमा उपभोक्ताले अब थप ५÷५ हजार गरी क्रमशः १५ हजार र २० हजार तिर्नुपर्नेछ । जुन २०७२÷७३मा १० हजार र १५ हजार थियो।
उता, सरकारले वार्षिक रूपमा असुली गर्ने सवारी साधन करको दरमा भने सामान्य मोटरसाईकलको करमा भने बृद्धि नगरेको यातायात व्यवस्था विभागद्वारा जारी गरिएको महसुल दरमा उल्लेख गरिएको छ । उक्त सूची अनुसार सवारी साधन कर अन्तर्गत् १ सय २५ सीसीसम्मको मोटरसाईकलले प्रतिवर्ष २५ सय रूपैयाँ तिर्नुपर्ने छ भने १ सय २६ देखि २ सय ५० सीसीसम्मको मोटरसाईकलले वार्षिक ४ हजार रूपैयाँ तिर्नुपर्नेछ। यी दुई तहका मोटरसाईकलमा भने अघिल्लो वर्षको तुलनामा कर बृद्धि गरिएको छैन।
तर, २ सय ५१ देखि ४ सय सीसीसम्मका मोटरसाईकलमा भने २ हजार र ४ सय सीसी भन्दा माथिका मोटरसाईकलमा ५ हजार रूपैयाँ कर थप गरिएको छ । त्यस्तै, ४ सय सीसीसम्मका मोटरसाईकलमा अहिलेसम्म तिर्नुपर्ने कर कूल ६ हजारबाट बृद्धि गरेर ८ हजार बनाईएको छ भने ४ सय सीसी भन्दा बढीका मोटरसाइकलमा १० हजार रूपैयाँ बाट बढाएर प्रतिवर्ष १५ हजार रूपैयाँ पुर्याईएको पनि विभागले जानकारी दिएको छ । जुन बृद्धिदरलाई प्रतिशतमा हेर्दा क्रमशः ३३.३ प्रतिशत र ५० प्रतिशत हुन आउँछ। यसरी लाग्ने रकम भन्सारमा लाग्ने महसुल भन्दा फरक भएकोले भन्सार महसुल तिरेकाले पनि यो महसुल अनिवार्य तिर्नुपर्ने व्यवस्था रहेको यातायात व्यवस्था विभागले जानकारी दिएको छ।