www.deltrox.com

बाढीका कारण झापामा एकजनाको ज्यान गयो; पाँचसय बढी घर डुवानमा

प्रकाशित मिति :

floodसुशिला संग्रौला, बिर्तामोड । मंगलबार राति परेको अविरल बर्षासँगै आएको बाढीका कारण झापामा एकजनाको ज्यान गएको छ भने पाँचसय बढी घर डुवानमा परेका छन् । जिल्ला प्रहरी कार्यालयका अनुसार मंगलबार राति परेको अविरल बर्षाका कारण झापाका विभिन्न नदीमा आएको बाढीका कारण एकजनाको मृत्यु भएको र पाँचसय बढी घरपरिवार विस्थापित भएको हुन् । झापाको रतुवा नदीमा आएको बाढीमा इलाम इलाम चुलाचुली–६ निवासी सुरेशकुमार राइको बुधबार बिहान खोलातर्ने क्रममा खेलाले बगाएर मृत्यु भएको बताइएको छ । यता विरिङ नदीमा आएको बढीकारण खुदुनावारी–१ र २ मा जम्मा ८० घर, शरणामति–३ र ५ मा गरी २१५ घर, राजगढी चारमा १२० घर परिवार डुवानमा परेका छन् । त्यसैगरी माइनदीमा आएको बाढीमा टाँघनडुब्बा–९ मा १२५ घर र शरणामति ८ मा १२५ घर परिवारलाई सुरक्षित स्थानमा सारिएको रेडक्रस सोसाइटी झापाका सभापति लोकराज ढकालले जानकारी दिनुभयो । त्यस्तै मेची नदीमा आएको बाढीमा मेचीनगर–१० स्थित सुँगुर ठ्याकमा २० घर डुवानमा परेका छन् । डुवानमा परी वेघर बनेकाहरु र सुत्केरी महिलाहरुलाई नेपाल रेडक्रस सोसाइटी, नेपाल प्रहरी, नेपाली सेना र शसस्त्र प्रहरीले उद्धार गरी सुरक्षित स्थानमा सारिएको र अति विपन्न एक परिवार बराबर २० केजी चामल, रेडक्रसको एकसेट राहत सामग्री वितरण गरिएको जिल्ला प्रहरी कार्यालय झापाले जनाएको छ। बुधबार दिनभर बाढीले क्षति पुर्याएका स्थानहरुमा प्रमुख जिल्ला अधिकारी तेज प्रसाद पौडेल, स्थानीय विकास अधिकारी फडिन्द्र दाहाल, नेपाली सेनाका गणपति खेमनारायण पौडेल, प्रहरी उपरिक्षक रविन्द्रनाथ रेग्मी, नेपाल रेडक्रस सोसाइटी झापा सभापति लोकराज ढकाल, नेपाली कांग्रेस झापा सभापति उद्धव थापा, एमाओवादी झापा प्रमूख धर्मशिला चापाँगाई, सिचाँई कार्यालय प्रमुख कुञ्जनभक्त श्रेष्ठ लगायतको टोलीले अवलोकन गरेको थियो । त्यसैगरी झापा शनिअर्जुन नगरपालिकास्थित फुलमति खोलामा आएको बाढीका कारण खोलाको पक्की पुल बंग्याएको छ ।

Scroll To Top