काठमाडौं । ताजिकिस्तानमा भइरहेको एएफसी यू–२३ एसियन कप छनोट फुटबलमा नेपालले लगातार गोलको भारी बोकेको छ । नेपालले दोस्रो हार बेहोरेको छ । बिहीबार राति भएको खेलमा नेपाल आयोजक ताजिकिस्तानसँग ६–० गोल अन्तरले पराजित भयो ।
यसअघि पहिलो खेलमा नेपाल इरानसँग ४–० गोल अन्तरले पराजित भएको थियो । नेपालले दुई खेलमै १० गोलको भारी बोकेको छ । नेपालले छनोटको अन्तिम खेलमा आइतबार लेबनानसँग खेल्नेछ । यो खेलमा भने नेपालले गोल गर्ने अपेक्षा गरिएको छ ।
नेपाल लगातार दोस्रो खेलमा पराजित भएसँगै छनोटको समूह चरणबाटै बाहिरिएको छ ।
यस्तो रह्यो नेपाल–ताजिकिस्तान बीचको खेल–
–नेपालले पहिलो हाफमा ३ तथा दोस्रो हाफमा ३ गोल खायो ।
–ताजिकिस्तानलाई जित दिलाउन शेर्भोनी माबत्शोएभ, शारफजोन सोलेहोभ, रुस्तम सोइरोभ, मुहम्मादली अजिजबोएभ, भादत हानोनोभ र इमोमाली अखामादखोनले १–१ गोल गरे ।
–२४ औं मिनेटमा शेर्भोनीले गोल गरे ।
–३३ औं मिनेटमा सोलेहोभले गोल गरे ।
–४१ औं मिनेटमा रुस्तमले गोल गरे ।
–६३ औं मिनेटमा अजिजबोएभले गोल गरे ।
–६८ औं मिनेटमा हानोनोभले पेनाल्टीमा गोल गरे ।
–७२ औं मिनेटमा अखामादखोनले गोल गरे ।
अंक तालिका
समूह बी को खेलमा ताजिकिस्तान २ खेलमा ६ अंक जोडेर शीर्ष स्थानमा रहेको छ ।
इरान पनि समान २ खेलबाट ६ अंकसहित दोस्रो स्थानमा छ । इरानले लेबनानलाई २–० गोल अन्तरले हरायो ।
लेबनान तेस्रो स्थामा रहेको छ । लेबनानले ३ गोल खाएको छ । गोल गरेको छैन ।
नेपालले १० गोल खाएको छ । गोल गरेको छैन ।
अब आइतबार हुने अन्तिम खेलमा लेबनान र नेपालले गोलको खाता खोल्ने अपेक्षा छ ।
आइतबारै इरान र ताजिकिस्तान खेल्नेछन् । यो खेलको विजेता सीधै यू–२३ एसियन कप खेल्न पाउने छ । उपविजेतामध्ये उत्कृष्ट ४ टिमले पनि एसियन कप खेल्न पाउने भएकाले यी दुईमध्ये आइतबार हार्ने टिमले पनि मौका पाउने अवसर छ ।
