फिलाडेल्फिया। अमेरिकाको राष्ट्रपति निर्वाचनमा हिलारी क्लिन्टन डेमोक्रेटिक पार्टीबाट उम्मेदवार घोषित भएकी छिन् । उनी अमेरिकी राष्ट्रपतिको निर्वाचनमा उम्मेदवार बन्ने पहिलो महिलासमेत भएकी छिन् ।
उनी निर्वाचित भएमा अमेरिकाको इतिहासमा प्रथम महिला राष्ट्रपति हुनेछिन् । पूर्व राष्ट्रपति बिल क्लिन्टनकी पत्नी हिलारी सिनेटर र विदेश मन्त्री रहिसकेकी छन् ।
अहिलेको निर्वाचनमा हिलारीले उदार पक्षको र रिपब्लिकन उम्मेदवार डोनाल्ड ट्रम्पले अनुदार पक्षको प्रतिनिधित्व गर्ने रुपमा लिइएको छ ।
क्लिन्टनको ट्रम्पसँग कडा प्रतिस्पर्धा हुने अनुमान गरिएको छ । ट्रम्पले यसअघिदेखि नै क्लिन्टनलाई गालीगलौज गर्न थालिसकेका छन् ।
यता, हिलारी क्लिन्टनलाई मनोनयन गर्नका लागि फिलाडेल्फियामा डेमोक्रेटिक पार्टीको राष्ट्रिय अधिवेशन जारी रहेको छ ।
सो अधिवेशनमा उनको पार्टीका प्रतिस्पर्धी बर्नी स्यान्डर्स समर्थक कार्यकर्ताले कार्यक्रम अवरुद्ध गर्न खोजेका थिए ।
स्यान्डर्सले भने आफूभन्दा धेरै मतले अगाडि रहेकाले क्लिन्टन नै उम्मेदवार बन्नुपर्ने भन्दै उनकै पक्षमा भाषण गरेका थिए ।
उनले अबको राष्ट्रपति क्लिन्टन नै हुने विश्वाससमेत व्यक्त गरेका छन् । क्लिन्टनले पनि सम्वोधन गर्ने कार्यक्रम रहेको छ ।
डेलिगेट्स्मध्ये अधिकांश महिला निकै उत्साही छन् । उनीहरुले अमेरिकामा महिला युग सुरु भएको प्रतिक्रियासमेत दिएका छन् ।
