चाल चाल्दै एन्फा, अवैधानिक भनिएका श्रेष्ठकै हस्ताक्षरमा बैङ्क कारोबार

प्रकाशित मिति : २०७२ मङ्सिर १६ बुधबार
काठमाडौं । अखिल नेपाल फुटबल संघ एन्फाको असन्तुष्ट पक्षले अवैधानिक भन्दै आएका कार्यबाहक अध्यक्ष नरेन्द्र श्रेष्ठकै हस्ताक्षरमा अब बैंङ्क कारोबार हुने भएको छ । विश्व फुटबल महासंघले मान्यता दिइसकेका श्रेष्ठले नै बैंङ्क खाताको काम चलाउने छन् । 
 
श्रेष्ठले नेतृत्व सम्हालेपछि बुधबार पहिलोपटक एन्फाका उपलब्ध सदस्यहरुको बैठक बसेको छ । कार्यसमिति बैठकले बैङ्क खातामा श्रेष्ठकै हस्ताक्षर चल्ने निर्णय गरेको हो । एन्फा अध्यक्ष गणेश थापा फिफाको कारबाहीमा परेपछि १४ दिनअघि एन्फाले श्रेष्ठलाई कार्यबाहक जिम्मेवारी दिएको थियो । साधारण सभाबाट निर्वाचित असन्तुष्ट पदाधिकारीले श्रेष्ठ वैधानिक नभएको भन्दै एन्फा कार्यशैलीको विरोध गर्दै आएका छन् । यसअघि, राष्ट्रिय खेलकुद परिषद्ले समेत एन्फालाई अर्को व्यवस्था नभए सम्म थप गतिविधि नगर्न भनेको थियो । 
 
बुधबारको बैठकले आगामी फेबु्रअरी २६ तारिखमा हुने फिफाको चुनावमा एएफसी अध्यक्ष शेख सल्मानलाई सघाउने निर्णयसमेत गरेको छ । बैठकमा आगामी वर्ष हुने एएफसी यु–१४ गल्र्स क्षेत्रीय च्याम्पियनसिप फुटबलको आयोजनाको दाबेदारी दिनेसमेत निर्णय भएको बैठकमा सहभागि पदाधिकारीहरुले बताए । 
 
यस्तै, बैठकमा साफ च्याम्पियनसिप फुटबलको तयारीलाई अझ सशक्त बनाउने बारेमासमेत छलफल भएको छ । कार्यसमितिले गरेको निर्णय सुनाउन गरेको पत्रकार सम्मेलनमा कार्यबाहक अध्यक्ष श्रेष्ठले विधानअनुसार असन्तुष्ट पक्षलाई पनि समेटेर लैजाने प्रतिबद्धता जनाए । श्रेष्ठ एन्फा बरिष्ठ उपाध्यक्ष ललितकृष्ण श्रेष्ठको निधनपछि मनोनित भएका थिए ।  तस्वीर: एन्फा
 

ईआइसिटी नेपाल प्रालिद्धारा संचालित हाम्राकुरा डटकममा प्रकाशित कुनै पनि सामाग्री ईआइसिटी नेपालको पूर्व जानकारी विना हुवहु एवं आंशिक रुपमा समेत कपी गरि प्रकाशन गर्नु दण्डनीय छ। यस किसिमका कार्य गर्ने उपर ईआइसिटी नेपाल कानुनी उपचार खोज्न बाध्य हुने भएकाले सम्बन्धित सवैलाई सचेत हुन जानकारी गराइन्छ।

नयाँ