काठमाडौं । प्रधानमन्त्री पुष्पकमल दाहालले आफ्नो भारत भ्रमणबारे आफ्नो पार्टीका नेताहरुलाई जानकारी गराएका छन् ।
बुधबार बिहान आफ्नो निवास लाजिम्पाटमा केन्द्रीय कार्यालय (हेडक्वार्टर)को बैठक डाकेर दाहालले आफ्नो भारत भ्रमणबारे नेताहरुलाई जानकारी गराएका हुन् ।
बैठकपछि माओवादी केन्द्रका प्रवक्ता पम्फा भुसालले प्रधानमन्त्रीले भारत भ्रमणबारे सबै हेडक्वार्टर सदस्यहरुलाई जानकारी गराएको सुनाइन् ।
उनले भनिन्, ‘यो भ्रमण मूख्यतः गुडविल भिजिट हो । दोस्रो, विगतमा नेपाल र भारतका बीचमा भएका सहमति, समझदारी कार्यान्वयन गर्ने र तीब्रता दिनेमा केन्द्रित हुनेछ । भ्रमण मूलतः हुलाकी राजमार्ग, पुनःनिर्माण, विद्युत् व्यापार सम्झौता आदिमा केन्द्रित हुनेछ ।’
प्रवक्ता भुसालकाअनुसार माओवादी केन्द्रका नेताहरुले प्रधानमन्त्रीलाई भारत भ्रमणको शुभकामना दिँदै भ्रमण दुई देशको सम्बन्ध सुदृढ गर्न र नेपाल राष्ट्रिय हितको पक्षमा काम गर्न सुझाव दिए ।