पैसा पाएपछि महानगरका इन्जिनियरले खिचेको ८ तल्लाको भवन यसरी भयो ५ तल्ला !

महानगरपालिकामा मिलेमतोमा के सम्म हुँदोरहेनछ ? हेर्नुहोस् प्रमाणसहित

प्रकाशित मिति : २०७३ माघ १९ बुधबार
तस्वीर : हाम्राकुरा
काठमाडौं । काठमाडौंको थापाथलीबाट त्रिपुरेश्वर तर्फ जाँदा १०० मिटरजतिको दूरीमा टुकुचा खोला पुगिन्छ । त्यो खोला तरेर पारी पुग्नेवित्तिकै खोलासँगै जोडिएको एउटा ठूलो व्यापारिक भवन देख्न सकिन्छ । जुन भूमिगत रुपमा एक तल्ला र माथि नै ७ तल्लाको रहेको तस्वीरमा पनि स्पष्टसँग देख्न सकिन्छ । 
 
१३ आना २ पैसा ३ धुर क्षेत्रफलमा बनेको उक्त भवन सुनिलराम बैद्य समेत ४ जना जग्गाधनीको नाममा निर्माण भएको हो । मिति २०६५ साल मंसिर २ गते नक्सापास गरेर ८७ फिट सम्म उचाईको भवन बनाउन सक्ने गरी दिईएको निर्माण स्वीकृति पछि २०७२ सालमा यसको निर्माण सम्पन्न भएको भनेका काठमाडौं महानगरपालिकाले प्रमाणपत्र दिएको छ । जुन प्रमाणपत्र तल प्रस्तुत गरिएको छ । 
 
यसरी महानगरपालिकाले दिएको प्रमाणपत्रमा कूल २५ सय ४८.९७ वर्गफिटको क्षेत्रफलमा भूमिगत तल्ला एउटा र त्यस भन्दा माथि पाँचवटा तल्ला रहेको भनेर निर्माण सम्पन्न प्रमाणपत्र दिईएको छ । २३ सय ३८ वर्ग मिटरको भूमिगत तल्ला र त्यस माथिका ४ तल्ला क्रमशः २६ सय ७३ वर्ग मिटरको र सबैभन्दा माथिको तल्ला भने ४ सय ८ वर्ग मिटरको रहेको उल्लेख गरिएको छ । यस्तो हुँदा उक्त भवनको बीचको २ तल्ला गायव भएको देखिन्छ । महानगरसँग यसको कानूनी उत्तर छैन कि निर्माण सम्पन्न भईसकेको भवनको बीचको दुई तल्ला कहाँ गायव भयो ? वास्तविक भवन पनि तस्वीरमा देख्न सकिन्छ जुन भूमिगत बाहेक माथि मात्रै ७ तल्लाको रहेको छ । 
 
फोटोसपबाट मिलाईन्छ तस्वीर 
कुनैपनि भवनको निर्माण सम्पन्न प्रमाणपत्र दिने बेलामा गएका इन्जिनियरहरुले घरको चारैतिरबाट स्पष्ट देखिनेगरी फोटो खिचेर लैजाने गर्दछन् । ता कि उक्त भवन कति तल्लाको छ भन्ने सवालमा सबैलाई जानकारी होस् । तर, कसरी हुन्छ त बढी तल्ला भएको घर पनि नक्सा अनुसार स्वीकृत ? अर्थात् यही प्रकरणमा जस्तै बीचको तल्ला कसरी तस्वीरमा गायव गराईन्छ त ? यो प्रश्नमा महानगरका एक अधिकारीले भने सबै फोटोसपबाट मिलाईन्छ । 
 
यो भवनको विषयमा पनि कामपा नक्सा शाखामा स्वीकृति पाए बमोजिम नै पाँच तल्लाको तस्वीर राखिएको छ । तर, वास्तविक रुपमा भने भवन ७ तल्लाको रहेकोे छ । यसरी फोटो खिच्न गएका इन्जिनियरहरुले समेत महानगरकै उच्च अधिकारीहरुसँग मिलेर निर्माण स्वीकृति दिँदा यस्तो गर्नेगरेको स्पष्ट भएको छ । 
 
इन्जिनियरकै हस्ताक्षर नक्कली 
उता, यो घरको नक्सा स्वीकृत गराउने क्रममा स्थलगत निरीक्षणमा गएका जुई÷इन्जिनियरको नामबाट गरिएको हस्ताक्षर नै कीर्ते रहेको आरोप समेत लाग्न थालेको छ । उक्त प्रमाणपत्रमा महानगरले नक्सा स्वीकृत गर्दा प्रयोग भएका वारेस(दलाल) स्रोतले दिएको जानकारी अनुसार सो घरको स्वीकृतिकोलाई हस्ताक्षर गरिएका जुईको हस्ताक्षर नै कीर्ते छ । 
 
यस्ता गैरकानूनी कार्यहरु काठमाडौं महानगरपालिकाको नक्सा शाखामा यो न त पहिलो हो न त यस्ता काम अन्तिम नै हो पनि भन्न सकिने अवस्था छैन । तर, यसरी सधैंभरी भ्रष्टाचारको अखडा बनेको भनेर आरोप लाग्ने महानगरको भ्रष्टाचारको खेलो दिन प्रतिदिन पर्दाफास हुँदै गएको छ ।  
 

ईआइसिटी नेपाल प्रालिद्धारा संचालित हाम्राकुरा डटकममा प्रकाशित कुनै पनि सामाग्री ईआइसिटी नेपालको पूर्व जानकारी विना हुवहु एवं आंशिक रुपमा समेत कपी गरि प्रकाशन गर्नु दण्डनीय छ। यस किसिमका कार्य गर्ने उपर ईआइसिटी नेपाल कानुनी उपचार खोज्न बाध्य हुने भएकाले सम्बन्धित सवैलाई सचेत हुन जानकारी गराइन्छ।

नयाँ