arrow

दक्षिण कोरिया नेपालको जलविद्युत्मा लगानी गर्न तयार, उर्जामन्त्री दंग

logo
प्रकाशित २०७३ चैत ८ मंगलबार
south-korea.jpg.jpeg
काठमाडौँ । दक्षिण कोरिया सरकारले नेपालको जलविद्युत् क्षेत्रमा लगानी गर्ने इच्छा व्यक्त गरेको छ । विश्वव्यापी रुपमा जलवायु परिवर्तन भइरहेको र हरित ऊर्जामा ध्यान दिनुपर्ने अवस्था सिर्जना भइरहेको सन्दर्भमा दक्षिण कोरियाले नेपाललाई सहयोग गर्ने वचन दिएको छ । 
 
ऊर्जामन्त्री जनार्दन शर्मासँग दक्षिण कोरियाका विद्युत् तथा व्यापार उपमन्त्री हान जीनह्युनले गरेको भेटवार्तामा नेपालको जलविद्युत् क्षेत्रमा कोरियाले लगानी गर्ने वचन दिएका हुन् ।  
 
विकासको चरम सीमामा पुगेको दक्षिण कोरियाले हरित ऊर्जामा ध्यान दिनुपर्ने भन्ने अन्तर्राष्ट्रिय मान्यतालाई सहयोग गर्नसमेत नेपाल लगानीका लागि उपयुक्तस्थल भएको भन्दै कोरियाली उपमन्त्रीले उपयुक्त आयोजनाको पहिचान गरी जानकारी गराउन आफूलाई आग्रह गरेको मन्त्री शर्माले जानकारी दिए । 
 
“नेपालसँग सहकार्यका हात अगाडि बढाउन कोरिया सरकार तयार रहेको मैले थाहा पाएँ, उनीहरुले नेपाललाई सहयोग गर्ने विभिन्न मुलुकमध्ये उच्चकोटीमा राखेर हेरेका छन्, नेपालको ऊर्जा क्षेत्रमा लगानी गर्न उनीहरु इच्छुक छन्”– मन्त्री शर्माले भने । 
 
दक्षिण कोरिया सरकारले सरकारी तवरबाटै वा निजी क्षेत्रलाई समेत लगानीका लागि प्रेरित गर्ने जानकारी उपमन्त्रीले मन्त्री शर्मालाई गराएका थिए । 
 
सार्वजनिक निजी साझेदारीको अवधारणामा पनि काम गर्न सकिने तथा निजी लगानीलाई पनि नेपालमा प्रोत्साहित गर्न सकिने भन्दै सरकारले त्यसको वातावरण बनाएको भन्दै मन्त्री शर्माले लगानीको सुरक्षा र प्रतिफलका विषयमा समेत निश्चित भएर आउन आफूले आग्रह गरेको उल्लेख गरे । 
 
यस्तै, दक्षिण कोरियाको अन्तर्राष्ट्रिय सहयोग संस्था (कोइका)का तर्फबाट समेत लगानी गर्न सकिने तथा निजी लगानीकर्तालाई समेत स्वागत गरिने मन्त्री शर्माले कोरियाली उपमन्त्री र कोइकाका प्रतिनिधिलाई जानकारी गराएका थिए । 
 
मन्त्री शर्मासँगको भेटमा कोरियाली उच्च सरकारी अधिकारीले नेपाली कामदार इमान्दार र मेहनती भएको भन्दै नेपालीको पेसागत सुरक्षा एवम् अन्य सेवा तथा सुविधाका सम्बन्धमा आफूहरुकातर्फबाट इमान्दार प्रयास गर्ने वचन दिएको उल्लेख गरे । 
 
दक्षिण कोरियामा रोजगार अनुमति प्रणालीमार्फत ३५ हजार नेपाली युवालाई रोजगारी प्रदान गरेको छ । यस्तै, यसैवर्ष थप १० हजार नेपाली युवालाई रोजगारी प्रदान गर्ने जनाएको छ । 
 
नेपालको जलविद्युत् क्षेत्रमा लगानी जुटाउने लक्ष्यका साथ ऊर्जामन्त्री दक्षिण कोरियाको भ्रमणमा छन् । उनले आइतबार नेपाली समुदायसँग अन्तक्र्रिया गरी लगानीका लागि आग्रह गरेको उनका निजी सचिव कृष्ण केसीले जानकारी दिए । रासस 



लोकप्रिय समाचार
लोकप्रिय समाचार
नयाँ