काठमाडौं । इङलिश प्रिमियर लिग फुटबलमा दोस्रो स्थानको टोटनह्याम हटसपरले राम्रो प्रदर्शन गरेपछि चेल्सी दबाबमा आएको छ ।
टोटनह्यामले एएफसी बर्नमाउथलाई ४–० ले हरायो । देम्बेले, मिन सन, ह्यारी काने र भिन्सेन्ट जान्सेनले गोल गरे ।
यो जितपछि टोटनह्यामको ३२ खेलबाट ७१ अंक भएको छ भने चेल्सीको ३१ खेलबाट ७५ अंक छ ।
अन्य खेलमा म्यानचेष्टर सिटीले साउथह्याम्पटनलाई ३–० ले हरायो । सर्जियो अगुएरो, लोरी साने र भिन्सेन्ट कोम्पानीले १–१ गोल गरे ।
यो जितले म्यानचेष्टर सिटी ६४ अंकसहित तेस्रो स्थानमा आएको छ । त्यस्तै वाटफोर्टले स्वान्सीलाई १–० ले, स्टोकले हल सिटीलाई ३–१ ले, एभर्टनले बर्नलीलाई ३–१ ले हरायो ।
क्रिष्टल प्यालेस र लेस्टर सिटीले २–२ को तथा सन्डरल्याण्ड र वेष्टह्यामले २–२ को बराबरी खेलेका छन् ।
आइतबारको आपसी भिडन्त
आइतबार चेल्सीको भिडन्त म्यानचेष्टर युनाइटेडसंग हुँदैछ । खेल राति ८ः४५ बजे हुँदैछ ।
म्यानचेष्टर युनाइटेडको मैदान ओल्ड ट्राफोर्डमा खेल हुँदै गर्दा सबैभन्दा बढी दबाब होजे मौरिन्होलाई हुनेछ ।
मौरिन्होले अहिले म्यानचेष्टर युनाइटेड सम्हाले पनि गत सिजन चेल्सीबाट निकालिएका थिए ।
साँझ ६ः१५ बजे वेष्ट ब्रोम र लिभरपुल खेल्ने कार्यक्रम छ ।
