ओल्ड ट्राफोर्ड । इङलिश प्रिमियर लिग फुटबलमा म्यानचेष्टर युनाइटेडले चेल्सीमाथि २–० को शानदार विजयी नतिजा निकालेको छ ।
घरेलु मैदान ओल्ड ट्राफोर्डमा आइतबार राति खेलेको म्यानचेष्टरले ७५,२७२ दर्शक सामु शानदार जित आत्मसात् गर्ने क्रममा चेल्सीलाई हराएको हो ।
खेलको ७ मिनेटमै मार्कस राशफोर्डले पहिलो गोल दिलाए । चेल्सीका लागि खेलाडीहरु गोल गर्नुको सट्टा डिएगो कोस्टा र गेरी काहिलले पहेंलो कार्ड खाए ।
४९ औं मिनेटमा एनदर हेरेराले गोल गरे । त्यसपछि दुवैतर्फ थप गोल भएन र म्यानचेष्टरले लिग तालिकाको शीर्ष स्थानमा रहेको चेल्सीमाथि रबाफ देखायो ।
यो जितले सबैभन्दा ठूलो राहत म्यानचेष्टर युनाइटेड प्रशिक्षक होजे मौरिन्होलाई दिएको छ ।
लास्ट सिजन चेल्सीबाटै बर्खास्तीमा परेका मौरिन्होलाई चेल्सीमाथि जित निकाल्नु पक्कै पनि आनन्दको विषय हो ।
यो जितपछि पनि म्यानचेष्टर युनाइटेडको उपाधिको आशा कमै भए पनि दावेदारी भने खुल्ला भएको छ ।
अंकतालिका अनुसार ३२ खेलबाट चेल्सीको ७५ अंक छ भने टोटनह्याम हटसपरको ७१ अंक छ । त्यस्तै एक खेल बढी खेलेको लिभरपुलको ६६ अंक छ ।
लिभरपुलले आइतबारको खेलमा वेष्टब्रोमलाई १–० ले हरायो । म्यानचेष्टर सिटीको ६४ तथा एक खेल कम खेलेको म्यानचेष्टर युनाइटेडको ६० अंक भएको छ ।
